Araldy qutqarý halyqaralyq qoryna tóraǵalyq etý kezegi 2024 jyldan bastap elimizge ótti. Aldaǵy úsh jylda atalǵan uıymdy Qazaqstan basqarady. Memleket basshysy Qasym-Jomart Toqaev 2026 jyldyń sońyna deıin HAQQ Prezıdenti bolyp saılandy. Bul týraly Sý resýrstary jáne ırrıgasııa mınıstrliginiń baspasóz qyzmeti málimdedi, dep habarlaıdy Egemen.kz.
Quramyna Qazaqstan, Tájikstan, Túrikmenstan, О́zbekstan kiretin atalǵan halyqaralyq uıym Aral teńizin qutqarýǵa jáne óńirdiń ekologııalyq ahýalyn jaqsartýǵa, sondaı-aq jalpy áleýmettik-ekologııalyq problemalardy sheshýge baǵyttalǵan birlesken memleketaralyq ekologııalyq jáne ǵylymı-praktıkalyq baǵdarlamalar men jobalardy júzege asyrýmen aınalysady.
Sý resýrstary jáne ırrıgasııa mınıstri Nurjan Nurjigitov Ortalyq Azııa memleketterimen, halyqaralyq uıymdarmen, qarjy ınstıtýttarymen yntymaqtastyqty arttyrý josparlanyp otyrǵanyn aıtty.
«Bıyl biz Dúnıejúzilik bankpen birge júzege asyrylyp jatqan Soltústik Araldy saqtaý jobasynyń ekinshi kezeńin bastaýdy josparlap otyrmyz. Aral teńizin qutqarý - bul HAQQ-ǵa qatysýshy barlyq elderdiń birlesken kúsh-jigerimen ǵana oryndalatyn mindet. Aldaǵy úsh jylda biz osy baǵytta mańyzdy nátıjelerge qol jetkizýge nıettimiz», dedi mınıstr.