Salıqalyq pen sabyrlyq myqty saıasatkerdiń negizgi, qala berse ómirlik qaǵıdaty bolsa kerek. Memleket basshysy Q.Toqaevtyń «Egemen Qazaqstan» gazetinde jarııalanǵan suhbaty halqymyzdyń kókeıinde júrgen talaı túıtkildi suraqtarǵa shynaıy jaýap bergen ashyq áńgime boldy. Qasiretti qańtarǵa qatysty da buryn-sońdy aıtylmaǵan jańa túıindemelerdi shynaıy aıtqanyn baıqaımyz.
Qańtar qasiretine de eki jyl tolyp otyr. Ýaqyt zymyrap ótip jatyr, biraq sol kezdegi halyqtyń júregine túsken syzat áli syzdap tur, jazylar emes. Árıne, ol bir-eki jylda jazylatyn da nárse emes. Biz sol qańtarda egemendigimiz ǵana emes, eldigimizden aıyrylyp qala jazdadyq. Shetti aıtpaǵanda, ózimizdiń aramyzda da túrli sáýegeıler ártúrli pikir taratyp, halyqtyń sanasyn sarsańǵa saldy. Dál osy kezdegi qosarlanǵan bıliktiń ekiushtylyǵy da kúmán qııalynda otyrǵan halyqtyń senimsizdigin tereńdete tústi. Burynǵy bıliktiń qudiretinen aıyrylyp qalǵysy kelmeýi jáne jańa bıliktiń jasap jatqan jańa reformalaryn qabyldamaý pıǵyly alańsyz otyrǵan halyqty aqyry dúrbeleńge saldy. Osyndaı syndarly ýaqytta Memleket basshysy Q.Toqaevtyń tabandylyǵy men qaıratty minezi, batyl sheshimderi, aıtqan ornyqty sózderi, salıqaly saıasaty, jasaǵan qadamdary, bar jaýapkershilikti óz moınyna ala bilýi, abdyrap otyrǵan eldiń esin jıǵyzdy, kúmánin seıiltti, úmitin oıatty. Bolmysynan ulttyq sana-sezimi bıik, el múddesine qater tóngen kezderde quryshtaı uıysa alatyn, aq-qarany ajyrata biletin halqymyz Prezıdentimizdiń aınalasyna birigip, kók týymyzdyń astyna jınalyp, qaısarlyǵyn tanytty. Eldik pen egemendikti tańdady.
Q.Toqaev sol qańtar qasiretinen keıingi eki jyldyń kóleminde, eldiń bolashaqqa degen senimin nyǵaıta túsý úshin, ekonomıkamyz turalap turyp qalmaýy úshin, álem aldynda júzimiz jarqyn, mártebemiz bıik, eldigimiz berik ekendigin dáleldeý úshin, ornyqty, mártebeli ornymyzdy nyq alýymyz úshin tynbaı eńbek etip keledi. Álemniń jartysyn sharlap, áıgili ınvestorlarmen kezdesip, memleketimizdiń ishki de syrtqy jaǵdaıynyń turaqty ekendigin dáleldeý úshin kúsh-jigerin aıamaı kele jatyr. О́ziniń halqynyń aldynda, basym daýyspen zańdy saılanǵan Prezıdent retinde qashan da shynaıylyǵynan tanǵan emes. Búgingi suhbat ta sonyń dáleli. El kókeıinde júrgen suraqtarǵa jaýap bere otyryp, Prezıdent memleketimizdiń bolashaǵyna qatysty senimdi jáne naqty qadamdardyń jasalǵanyn, olardyń saıası, ekonomıkalyq, zańnamalyq negizderiniń tolyq qalyptasqanyn, el ekonomıkasynyń serpindi damýyna barlyq alǵysharttyń bar ekenin ashyq jáne ashyp aıtty. Ol úshin elimizdiń tutastyǵy, oǵan negiz bolatyn halqymyzdyń yntymaǵy men birliginiń asa mańyzdylyǵyn alǵa tartty.
Ultymyz ben urpaǵymyzdyń bolashaǵy úshin, árbir azamattyń jan-jaqqa tartqylamaı, judyryqtaı birigip, jumyla eńbek etýi mańyzdy ekendigin taǵy da atap ótti. Shynynda da, Táýelsizdik – basymyzdaǵy baq. Ony aıalaı bilý – bárimizdiń mindetimiz.
Álı BEKTAEV,
Senat depýtaty