Úkimet otyrysynda elimizdegi sanıtarııalyq-epıdemıologııalyq ahýal týraly Densaýlyq saqtaý mınıstri Ajar Ǵınııat aıtyp berdi, dep habarlaıdy Egemen.kz Úkimettiń baspasóz qyzmetine silteme jasap.
Mınıstrdiń aıtýynsha jyl qorytyndysynda juqpaly aýrýlar boıynsha epıdemıologııalyq ahýal turaqty bolyp, aldyn alý sharalary nátıjesinde 20 asa qaýipti juqpaly aýrý tirkelmedi, onyń arasynda oba, tyrysqaq, polıomıelıt bar. Sondaı-aq 39 ınfeksııa boıynsha, onyń ishinde koronavırýs, rotavırýs, jiti ishek ınfeksııalary boıynsha syrqattanýshylyq tómendedi.
Aldyn alý maqsatynda byltyr qaýip-qater tobyna jatatyn 2,4 mln adam tumaýǵa qarsy ekpe alǵan, bul halyqtyń 12%-yn quraıdy.
Jalpy epıdemıologııalyq maýsym bastalǵannan beri stasıonarlarda 31 myńnan astam naýqas emdelgen, 2 mln-nan astam naýqas ambýlatorııalyq em alǵan.
El boıynsha barlyǵy 10 myńǵa jýyq ınfeksııalyq tósek-oryn qoıyldy, olardyń ishinde balalar úshin shamamen 3 myń tósek-oryn qarastyrylǵan.
Byltyrǵy jyl sońynda elde 29 myńnan astam qyzylsha juqtyrý jaǵdaıy tirkeldi, onyń 80%-y 14 jasqa deıingi balalarǵa tıesili. 1 qańtardan bastap 1 674 qyzylshamen syrqattanýshylyq tirkeldi.
Ahýaldy turaqtandyrý úshin ótken jyly jospar boıynsha vaksınalaý júrgizildi, nátıjesinde alty jasqa deıingi 700 myńǵa jýyq bala ekpe aldy. Qazirgi ýaqytta qosymsha vaksınalaý aıasynda 930 myńnan astam adam ekpe aldy, kún saıyn 20 myńnan astam adam vaksına alyp otyr.