Bıyl biryńǵaı jıyntyq tólemniń toqtatylýyna baılanysty páter baǵasy ósýi múmkin. Keıbir jyljymaıtyn múlik mamandary osylaı boljap otyr, dep habarlaıdy Egemen.kz aqparat agenttigi.
KTK arnasy jazǵandaı, óıtkeni baspanany jalǵa berýshiler kezinde bir aıǵa tek 3450 teńge salyq tólese, endi jeke kásipker retinde tirkelip, tabysynyń bir paıyzyn memleketke beredi.
Sonymen qatar áleýmettik tólemder de bar. Tıisinshe, kásipkerler jaldaý aqysyn ósirýi múmkin. Biraq rıeltorlardyń pikiri múlde bólek.
Páterdi jalǵa berip tabys tabý elimizde keń taralǵan kásiptiń bir túri. Máselen, Almatyda 250 myńǵa jýyq adam shaǵyn jáne orta bıznespen aınalysady. Al sonyń 20 myńy páterdi jalǵa berip kún kórýde. Alaıda olar bıyldan bastap tabysyna saı salyq tóleıtin bolady. Al kásipkerdiń shyǵysy kóbeıse, taýar qunyn kótere salatyny bárine málim.
- Biryńǵaı jıyntyq tólemniń toqtatylýy páterdi nemese úıdi jalǵa beretinderge tikeleı tıedi. Endi óz-ózin jumyspen qamtyp otyrǵandar salyqtan bólek áleýmettik tólem, zeınetaqy aýdarymy men medısınalyq saqtandyrýdy tóleıdi. Sáıkesinshe, eger bul somany jalǵa berýshiniń qaltasy kótermese, árıne, páteriniń jaldaý aqysyn kóteredi, – deıdi jyljymaıtyn múlik mamany Ásel Dosymbekova.
О́tken jyldyń qorytyndysy boıynsha jalǵa beriletin páterdiń quny orta eseppen bir sharshy metrine 3200 teńge bolypty. Aldyńǵy jylmen salystyrǵanda tórt jarym paıyzǵa qymbattaǵan. Quny joǵary páterler boıynsha kóshti bastap turǵan Almaty, keıin Astana. Negizinde jaldaý aqysynyń quny kóbine suranysqa baılanysty.
- Biryńǵaı jıyntyq tólemniń toqtatylýy naryqqa qalaı áser etetinin naqty aıtý qıyn. Keıbir jalǵa berýshiler salyq somasyn jaldaý aqysynyń ústine qosýy múmkin. Biraq baspanany jaldaý naryǵyna áldeqaıda kóbirek áser etetin – suranys, – deıdi jyljymaıtyn múlik saıtynyń sholýshysy Irına Mılıarova.
Al naryqtaǵy suranys máz emes.
- Biz byltyr tolyq jıhaz qoıylǵan, jóndelgen jańa turǵyn úı kesheninde eki bólmeli, 45 sharshy metrden bastap, 400-500 myńǵa ońaı ótkizetinbiz. Qazir 400-diń ózine suranys joq. О́ıtkeni usynys kóp, – deıdi rıeltor Nazgúl Smaǵúlova.
Atalmysh ózgeriske baılanysty jaldaý aqysynyń kóterilýi ekitalaı deıdi rıeltorlar. Biraq naryqty ne kútip turǵanyn eshkim dóp basyp aıta almaıdy. Suranys artsa, biryńǵaı jıyntyq tólemniń bar-joǵyna qaramaı baǵanyń qaıta sharyqtaıtyny jasyryn emes.