QR mádenıet qaıratkeri, belgili ánshi Qaraqat Ábildına jas qyz-jigitterge aqyl-keńesin jetkizdi, dep habarlaıdy Egemen.kz.
“1001 tún” baǵdarlamasyna qonaq bolǵan óner ıesi otbasy qundylyǵy jaıynda pikirin bildirip, jastar jar tańdaýda aldamshy sezimge berilmeý qajettigin alǵa tartty.
- Qoǵamda áıelge qol kóteretin er-azamattarymyzdyń beleń alyp bara jatqany janǵa batady. Bárimiz de ul-qyz ósirip otyrmyz. О́zimizdi ne kútip turǵanyn bilmeımiz. Aırandaı uıyp otyrǵan otbasynyń shyrqy buzylyp, balalar jetim qalyp jatyr. Árıne, janǵa batatyn dúnıeler. Osy keleńsiz oqıǵalardy boldyrmaý eki jasqa tikeleı baılanysty. О́mirlik serigińdi tańdaǵan kezde sen onyń tegi kim, qaı jaqtan ekenin zerdelep, biraz júrip, kózińdi jetkizip, ári-beri tanýyń kerek, - dedi kóp balaly ana.
Onyń paıymynsha, eń áýeli adam óziniń ómirine úlken jaýapkershilikpen qaraýy tıis. Aıaǵyn shalys baspaý úshin ózderi qyz bolyp júrgen kezdiń ózinde shoshańdamaı júrýi kerek.
- Qalaı bolsa, solaı jeńil júriske salynyp, ot basyp qalyp jatady. Sondaı jaǵdaıdyń saldary jaqsy bolmaıdy. Sondyqtan da "qyzǵa qyryq úıden tyıym" dep qazaq beker aıtpaǵan, – deıdi ánshi.
Sondaı-aq óner ıesi otbasyndaǵy janjal kezinde aldymen salmaq áıelge túsetinin atap ótti. Aıtýynsha, erli-zaıyptylardyń qarym-qatynasyn nyǵaıtatyn áıel kórinedi.
- Áıel – úıdiń berekesi men shyǵary. Kóp nárse aınalyp kelgende áıel zatyna baılanysty. О́ıtkeni áıeldiń arqasyndaǵy jaýapkershiliktiń júgi aýyr. Qalaı aıtsańyz da ol – shyndyq. Otbasylyq qarym-qatynas, bala tárbıesi, úıdegi tirshiliktiń barlyǵy áıelden suralady. Bala sabaqty jaqsy oqymaı jatsa da anasy jaýapty. Sondyqtan da qyzdarǵa, sińlilerime ot baspaý úshin, ókinbesteı ómir súrý úshin kishkene óz bolashaqtaryńyzǵa, ómirlerińizge abaılap qadam basyńyzdar dep aıtqym keledi. Árıne bir adamdy tolyq tanyp-bilip úlgermeısiń, degenmen de shamaly ýaqyt júrip, kóz jetkizip, sodan keıin turmysqa shyqsa eken, nekeli jaryna súıip qosylsa, sezimmen qosylsa eken deımin. Sezim barda senim paıda bolady. Adal taza mahabbatpen qosylǵan eki adam qansha jerden, qandaı jaǵdaı bolmasyn bir-birine meıirimdi, qaıyrymdy, keshirimdi bolady. Olardyń isi úlken daý-janjalǵa ulaspaıdy, – dep túıindedi ánshi.