Energetıka mınıstri Almasadam Sátqalıev seısenbi kúni Úkimet otyrysynda eldiń energetıkalyq keshenine qatysty jaǵdaı týraly baıandady, dep habarlaıdy Egemen.kz mınıstrliktiń baspasóz qyzmetine silteme jasap.
Mınıstrdiń aıtýynsha, tutastaı alǵanda Qazaqstannyń biryńǵaı elektr energetıkalyq júıesi Reseı jáne Ortalyq Azııa elderiniń energetıkalyq júıelerimen qatar qalypty jumys istep tur.
Elektr stansııalaryndaǵy jóndeý jumystarynyń kestesine sáıkes 2023 jyly 9 energoblokqa, 46 qazandyqqa jáne 46 týrbınaǵa kúrdeli jóndeý jumystary aıaqtaldy.
«Búgingi tańda elimizde 220 elektr stansııasy jumys isteıdi, onyń ishinde jalpy qýaty 2,8 GVt bolatyn 144 jańartylatyn energııa nysany bar. Stansııalyq jabdyqtardyń tozýynyń ortasha deńgeıi 56% quraıdy», delingen habarlamada.
Energetıkalyq qaýipsizdikti saqtaý, senimdi energııamen qamtamasyz etý úshin, sondaı-aq elektr energııasyn tutynýdyń jyl saıynǵy ósýin eskere otyryp, jańa energetıkalyq qýattardy iske qosý jáne jumys istep turǵan elektr stansııalaryn jańǵyrtý qajet.
«Bekitilgen qýat balansyna sáıkes 2030 jylǵa qaraı elektr energııasyna qajettilik 28,2 GVt quraıdy, al jańa qýattardy iske qosyp esepke alǵandaǵy qolda bar qýat 22 GVt quraıdy. Shamamen 4 GVt jańa qýatty iske qosqannyń ózinde elektr qýatynyń tapshylyǵynyń kólemi 6 GVt-tan asady. Elimizdegi osy tapshylyqty jabý jáne eksporttyq áleýetti arttyrý úshin Energetıka mınıstrligi 35 GVt-qa deıingi qosymsha jańa generasııalaý qýattaryn engizýdi kózdeıtin elektr energetıkasyn damytý boıynsha is-sharalar josparyn ázirledi», dep habarlady mınıstrlik.
Osylaısha, qoldanystaǵy elektr stansııalaryn qaıta qurý jáne keńeıtý esebinen qosymsha 5,6 GVt qamtamasyz etiledi.
Josparda qýattylyǵy 6,7 GVt bolatyn jańa generasııanyń qurylysy da qarastyrylǵan.
«Ikemdi generasııany tańdaý boıynsha aýksıon aıasynda Aqtaý, Atyraý, Aqtóbe, Taraz, Qyzylorda, Shymkent qalalarynda jalpy qýaty 2,4 GVt bolatyn janar-jaǵarmaı quıý stansııalaryn salý josparlanyp otyr. Jezqazǵan qalasynda 2029 jyldyń sońyna deıin qýattylyǵy 500 MVt bolatyn jańa jylý elektr ortalyǵy salynady», dep habarlady mınıstrlik.