Memleket basshysy Qasym-Jomart Toqaev «Egemen Qazaqstan» gazetine bergen suhbatynda el tarıhynda erekshe orny bar tulǵalarǵa qurmet kórsetý dástúri elimizdiń jalpyulttyq biregeıligin nyǵaıta túsýge zor septigin tıgizetinin aıta kele: «Bıyl áıgili ǵalym Qanysh Sátbaevtyń týǵanyna 125, dańqty batyrlar Saǵadat Nurmaǵambetov pen Raqymjan Qoshqarbaevtyń týǵanyna 100 jyl tolady» degen bolatyn.
Osyǵan oraı keshe Prezıdent janyndaǵy Ortalyq kommýnıkasııalar qyzmetinde ótken brıfıngte Qorǵanys mınıstrligi Tárbıe jáne ıdeologııalyq jumys departamentiniń basshysy, ádilet polkovnıgi Tileýhan Basqojaev sóz sóılep, Keńes odaǵynyń batyry, armııa generaly Saǵadat Nurmaǵambetov pen Qazaqstannyń Halyq qaharmany Rahymjan Qoshqarbaevtyń 100 jyldyǵyna arnalǵan is-sharalar týraly aıtyp berdi.
25 mamyrda Halyq qaharmany, táýelsiz Qazaqstannyń birinshi Qorǵanys mınıstri, armııa generaly Saǵadat Nurmaǵambetovtiń týǵanyna 100 jyl tolady. Qorǵanys mınıstrligi ókiliniń aıtýynsha, osy kúnge oraı batyrdyń týǵan jeri Aqkól qalasynda Saǵadat Nurmaǵambetov atyndaǵy alańǵa eskertkish ornatylmaq. Aqmola oblysynyń ákimdigi alańdy abattandyrady. Elimizdiń bas qalasynda Saǵadat Nurmaǵambetov atyndaǵy kóshege eskertkish daıyndaý jáne ony ornatý jumystaryn elorda ákimdigi uıymdastyrady.
– Qurlyq áskerleriniń áskerı ınstıtýtynda kýrsanttardyń ómirinen syr shertetin «Áskerı ant» telehıkaıasynyń túsirilimi aıaqtaldy. Onda Otan aldyndaǵy borysh, ar-namys, jaýapkershilik jáne súıispenshilik taqyryby pash etiledi. Týyndynyń tusaýkeseri otandyq telearnada 2024 jyldyń 7 mamyrynda ótpek, – dedi departament basshysy.
Buǵan qosa, Mádenıet jáne aqparat mınıstrligimen birlesip armııa generalynyń ómiri men qyzmeti týraly derekti ómirbaıandyq fılmdi respýblıkalyq telearnalardan kórsetý josparlanyp otyr. Qarýly Kúshter ardagerleriniń baspa basylymdaryna suhbattary, ocherkteri men estelikteri jarııalanyp, telesıýjetter men derekti fılmder teledıdardan kórsetiledi jáne áleýmettik jelilerge shyǵarý úshin beınejazbalar daıyndalyp jatyr.
Qorǵanys mınıstrligi taqyryptyq bannerler, bılbordtar jasaý úshin logotıp daıyndap, jergilikti atqarýshy organdarǵa jiberdi. Sonymen qatar Mádenıet jáne aqparat mınıstrligi ázirlegen poshta markasy da shyǵarylady.
T.Basqojaevtyń aıtýynsha, bıyl maýsym aıynda Almatyda Qurlyq áskerleri áskerı ınstıtýtynyń «Álı» oqý-jattyǵý ortalyǵynda armııa generaly Saǵadat Nurmaǵambetovti eske alýǵa arnalǵan «Aıbyn» halyqaralyq áskerı-patrıottyq jastar jıyny ótedi. Jıynǵa qatysýǵa Ujymdyq qaýipsizdik týraly shart uıymyna múshe memleketterdiń, sondaı-aq Ázerbaıjan men О́zbekstannyń komandalary shaqyryldy.
Qarýly kúshterdiń Memlekettik áskerı-tarıhı mýzeıi elimizdiń on qalasynda «Halyq júregindegi qaharman» atty kóshpeli kórmeler ótkizbek. Is-sharalar 17 qańtardan Almatydaǵy ortalyq memlekettik mýzeıden bastaý alady.
– 1924 jyly 19 qazanda týǵan Halyq qaharmany Rahymjan Qoshqarbaevtyń júz jyldyǵyn merekeleý boıynsha birqatar aýqymdy is-shara josparlanǵan. Barlyq garnızonda áskerı qyzmetshilerdiń, Qarýly kúshter ardagerleriniń, áskerı-patrıottyq uıymdar ókilderiniń qatysýymen kezdesýler, dóńgelek ústelder, aksııalar, chellendjder ótedi, – dedi T.Basqojaev.