Elimizde «Tasymaldaýshy» respýblıkalyq jedel aldyn alý is-sharasy aıaqtaldy. Júrgizýshiler men jolaýshylardyń qaýipsizdigin qamtamasyz etý maqsatynda balaǵat sózder aıtý, qoqys tastaý, mas kúıde jol júrý jáne temeki shegý syndy qoǵamdyq kólikterdegi quqyq buzýshylyqtardyń aldyn alýdy maqsat tutqan 5 kúndik operasııa barysynda polısııa qyzmetkerleri 1,2 myńnan astam ákimshilik quqyq buzýshylyqty anyqtady.
Onyń ishinde qoǵamdyq oryndarda ishimdik ishken nemese mas kúıde júrgen – 325, bótenniń múlkine qasaqana zaqym keltirgen – 2, belgilenbegen oryndarda temeki shekken – 90, usaq buzaqylyq jasaǵan – 51, qoǵamdyq oryndardy lastaǵan – 359, avtobýstarda jáne aıaldamalarda adamdarǵa tıisken 431 tártip buzýshy bar.
Mysaly, Shýchınsk jáne Taraz qalalarynda adamdardyń eskertýlerin elemegen mas jolaýshylar ustaldy. Er adamdar eki jaǵdaıda da marshrýttyq avtobýstarda shý shyǵarǵan. Olardyń árqaısysyna qatysty qoǵamdyq oryndarda mas kúıde júrgeni úshin ákimshilik hattama toltyryldy.
Sondaı-aq Pavlodar oblysynda tártip saqshylary avtobýs terezesinen qoqys tastaǵan jolaýshyny jaýapqa tartty. Quqyq buzýshyǵa qatysty jalpyǵa ortaq oryndardy lastaǵany úshin ákimshilik hattama toltyryldy. Polısııa qyzmetkerleri reıd barysynda qoǵamdyq kóliktiń jumysyna myńǵa jýyq jasyryn tekserý júrgizip, nátıjesinde 337 buzýshylyqty anyqtady.
«Adamnan aıla artylmaıdy» dep beker aıtylmasa kerek. Ashy sý iship, kólikke otyrýdy ańsaıtyndar polısııaǵa ustalyp qalǵan jaǵdaıda jazadan jaltarýdyń neshe túrli aıla-sharǵylaryn oılap taýyp jatyr. Sonyń bir kórinisi – júktilik týraly jáne kámeletke tolmaǵan balalary bar ekendigi týraly jalǵan anyqtamalardy kórsetý. Mundaı jaǵdaıda adam qamaýǵa alynbaıdy.
Bas prokýratýranyń málimetinshe, Jetisý oblysynda ákimdiktiń qyzmetkeri mas kúıde kólik aıdap ustalǵannan keıin aýdandyq sotqa óziniń kámeletke tolmaǵan balasy bar ekendigin rastaıtyn anyqtama usynǵan. Al bir áıel óziniń júkti ekenin bildiretin ýltradybystyq qorytyndyny kórsetken. Prokýratýra qyzmetkerleri eki jaǵdaıdy da tekserip, azamattardyń usynǵan qujattaryn joqqa shyǵardy. «Qazirgi kúni ýákiletti organdar resmı qujattardy qoldan jasaý faktileri boıynsha da sotqa deıingi tergep-tekserý jumystaryn bastady», dep atap ótti oblys prokýrory Madııar Basshybaev.