QR Ǵylym jáne joǵary bilim mınıstri Saıasat Nurbek aldaǵy ýaqytta qandaı mamandyqtar suranysqa ıe bolatynyn aıtyp berdi, dep habarlaıdy Egemen.kz.
Mınıstrdiń sózinshe, el ekonomıkasyn damytý úshin myqty ınjenerlik kadrlar tárbıelenýi kerek.
Qazaqstandaǵy ınjenerlik kadrlar Q.I.Sátbaev atyndaǵy QazUTZÝ, akademık Ábilqas Saǵynov atyndaǵy QarTÝ, Sh.Esenov atyndaǵy Kaspıı tehnologııa jáne ınjınırıng ýnıversıteti, Qaraǵandy ındýstrıaldy ýnıversıteti, Ǵ.Dáýkeev atyndaǵy Almaty energetıka jáne baılanys ýnıversıteti, D.Serikbaev atyndaǵy Shyǵys Qazaqstan tehnıkalyq ýnıversıteti sııaqty tehnıkalyq joǵary oqý oryndarynda daıyndalatyny barshaǵa málim.
«Tehnıkter» agrarlyq, energetıkalyq, metallýrgııa, qurylys, mashına jasaý jáne t.b. kóptegen salalarda suranysqa ıe», dedi Saıasat Nurbek.
Qazir mınıstrlik tehnıkalyq mamandarǵa bilim berý tásilin strategııalyq ózgertý boıynsha jumys júrgizip jatyr, sondaı-aq sheteldik joǵary oqý oryndarynyń tájirıbesin zerdelep, joǵary oqý oryndarynyń bazasyn jaqsartyp, beıimdeýge kúsh biriktirip otyr», dep jazdy Saıasat Nurbek óziniń telegram arnasynda.
«Mysaly, aımaqtyq D.Serikbaev atyndaǵy ShQTÝ-da ótken jyldyń sońynda Tıanszın kásiptik ınstıtýtymen (QHR) birlesip, zamanaýı oqý platformalarynda ınjenerlik praktıkany qoldana otyryp, ınnovasııalyq ádister boıynsha kólik ınjener-stýdentter oqytylatyn biregeı Lý Ban sheberhanasy ashyldy. Sheteldik seriktes joǵary oqý oryndarymen birlesken jumys otandyq joǵary oqý oryndarynyń kásibıligi men joǵary bilim deńgeıin kórsetedi», dedi Saıasat Nurbek.
Bıyl ShQTÝ bazasynda metallýrgııa jáne paıdaly qazbalardy óndirý salasyndaǵy Qazaqstan-Germanııa ǵylym jáne tehnologııalar ınstıtýtyn ashý josparda bar.
«Qurmetti mektep túlekteri men ata-analar, mamandyq tańdaǵanda tehnıkalyq mamandyqtarǵa nazar aýdaryńyz. «Tehnık» mamandary árdaıym qajet, sebebi mundaı mamandyqtyń bedeli kún óte artyp keledi», dep jazdy mınıstr.