Daǵdarys jaǵdaılarynda basqarý ortalyǵynda Tótenshe jaǵdaılar mınıstri Syrym Sháriphanovtyń tóraǵalyǵymen jedel shtabtyń kezekten tys otyrysy ótti. Otyrysqa azamattyq qorǵaý qyzmetteri, jedel shtabtyń jeke quramy jáne aýmaqtyq bólimsheler qatysty, dep habarlaıdy Egemen.kz vedomstvonyń baspasóz qyzmetine silteme jasap.
Jergilikti atqarýshy organdarmen jáne TJM aýmaqtyq bólimshelerimen beınekonferensbaılanys barysynda TJ mınıstri «Qazseldenqorǵaý» MM, IIM, Qorǵanys mınıstrligi, joldar men kópirler qyzmeti (QazAvtoJol), hımııalyq qyzmet, medısınalyq qyzmet, kólik qyzmeti, baılanys qyzmetiniń baıandamalaryn tyńdady.
«Seısmologııalyq baqylaýlar men zertteýlerdiń ulttyq ǵylymı ortalyǵy» JShS seısmıkalyq jaǵdaıdy baǵalaýyna sáıkes jaqyn arada Almaty boljamdyq polıgonynyń aýmaǵynda MSK-64K seısmıkalyq shkalasy boıynsha qarqyndylyǵy 7 baldan asatyn jer silkinisi kútilmeıdi.
Jedel shtabtarda uıymdastyrylǵan jedel jeli telefondaryna azamattardan 377 qońyraý kelip túsken.
«Qazseldenqorǵaý» MM aqparatyna sáıkes Almaty qalasy, Almaty, Jambyl, Túrkistan jáne Jetisý oblystary boıynsha barlyq beketter baqylaý men derekterdi berýdiń jedeldetilgen rejımine aýystyryldy. Beketterdiń jalpy sany - 76. Júrgizilgen zertteý nátıjeleri boıynsha jer silkinisi selden qorǵaý qurylystaryna teris áser etpegen. Sý rejıminde eshqandaı ózgeris joq. Syrǵymalar men kóshkinderdiń júrýi týraly aqparat túspegen. Tekserýler jalǵasyp jatyr.
Qarýly Kúshterdiń kúshteri men quraldary turaqty ornalasý pýnktterinde tur.
Kólik qyzmeti Almaty qalasynyń áýejaıy shtattyq rejımde jumys isteıtinin málimdedi. Qazirgi jaǵdaıda kezekshi aýysym kútpegen jaǵdaılar josparyna sáıkes áreket etti.
Qoǵamdyq tártipti saqtaý qyzmetiniń kúshteri men quraldary qyzmet atqarýdyń kúsheıtilgen nusqasyna aýystyryldy.
Otyrys sońynda TJ mınıstri tıisti azamattyq qorǵaý qyzmetterine birqatar tapsyrma berdi.