О́tken jyldyń qorytyndysyna sáıkes shyǵaryndylar boıynsha normatıvterdiń 3,3%-ǵa – 4,2 mln tonnadan 4,06 mln tonnaǵa deıin, tógindiler boıynsha 8%-ǵa – 2,5 mln tonnadan 2,3 mln tonnaǵa deıin tómendedi, dep jazady Egemen.kz Úkimettiń baspasóz qyzmetine silteme jasap.
Úkimet otyrysynda Ekologııa jáne tabıǵı resýrstar mınıstri Erlan Nysanbaev ekologııalyq zańnamanyń saqtalýyn baqylaý maqsatynda 652 tekserý júrgizilip, 1,6 myń quqyq buzýshylyq anyqtalǵanyn jetkizdi.
«Olar boıynsha joıý týraly 628 tıisti uıǵarym berildi. 322 mlrd teńgege 2,1 myń ákimshilik aıyppul salyndy, 11,3 mlrd teńge mólsherinde 1,8 myń aıyppul óndirildi. Qalǵandary oryndalyp jatyr. Ekologııalyq jaǵdaıdy jaqsartý úshin iri kásiporyndar jyl saıyn tabıǵatty qorǵaý is-sharalarynyń josparlaryn ázirleıdi. Sonymen qatar jurtshylyqpen, ekoaktıvıstermen, jergilikti atqarýshy organdarmen jáne tabıǵat paıdalanýshylarmen birlesip óńirlerdiń ekologııalyq máseleleri qaraldy. Nátıjesinde olardyń keshendi sheshimi boıynsha 18 jol kartasy ázirlengeni» aıtyldy.