Qorǵanys vedomstvosynda Qorǵanys mınıstrliginiń rejimi men qaýipsizdigin qamtamasyz etý jónindegi áskerı polısııa jasaǵynyń qurylǵanyna 21 jyl tolýyna arnalǵan saltanatty is-shara ótti.
Bólimshe qorǵanys vedomstvosynyń ákimshilik ǵımaraty paıdalanýǵa berilgen 2003 jylǵy 22 qańtarda Qorǵanys mınıstriniń dırektıvasymen qurylǵan bolatyn.
Qazaqstan Qarýly kúshteri Áskerı polısııa bas basqarmasynyń basshysy, polkovnık Rýslan Qulymbetovtiń merekelik quttyqtaýyn Rejim men qaýipsizdikti qamtamasyz etý jónindegi áskerı polısııa jasaǵynyń komandıri, polkovnık Talǵat Ámirhan jetkizdi.
«Sizderdiń bólimshelerińiz strategııalyq mańyzy bar nysandy kúzetý men qorǵaý jónindegi jaýapty mıssııany oryndaıdy. Onyń qaýipsizdigi jeke quramnyń kásibıligine, qaǵıdatshyldyǵy men qyzmetke adaldyǵyna baılanysty. Qyzmet pen laýazymdyq mindetterge kózqaras arqyly sizder quqyqtyq mádenıetti qalyptastyryp, áskerı tártip pen quqyqtyq tártiptiń jaı-kúıine áser etesizder», delingen quttyqtaýda.
Bólimsheniń áskerı qyzmetshileri aýmaqqa kirýdi jáne mınıstrlik ǵımaratyna kirip-shyǵýdy baqylaıdy. Baqylaý jáne basqarý júıelerin, kúzet-órt dabylyn, perımetrlik jáne ishki beınebaqylaýdy paıdalana otyryp, jasaqtyń jeke quramy senip tapsyrylǵan nysannyń qaýipsizdigin qamtamasyz etedi.
Qyzmettiń qalyptasýy men damýyna polkovnıkter Moldokýn Baramyshev, Erik Bákirbaev, Nurjan Shópenov jáne podpolkovnık Syrym Núsipjanovtar eleýli úles qosty. Bólimshe áskerı qyzmetshileriniń joǵary kásibı sheberligi olardyń ártúrli deńgeıdegi oqý-jattyǵýlardaǵy, halyqaralyq armııa oıyndary men Qarýly kúshterdiń áskerı-taktıkalyq jarystaryndaǵy nátıjelerinen kórinip júr.