Aýyl sharýashylyǵy mınıstrligi 23 qańtarda Túrkistan oblysynda «Aýyl amanaty» baǵdarlamasynyń jobalary boıynsha baspasóz týryn uıymdastyrdy, oǵan respýblıkalyq jáne óńirlik BAQ ókilderi qatysty, dep habarlaıdy Egemen.kz mınıstrliktiń baspasóz qyzmetine silteme jasap.
Esterińizge sala keteıik, «Aýyl amanaty» baǵdarlamasy Memleket basshysynyń tapsyrmasy negizinde júzege asyrylyp jatyr. Onyń basty maqsaty − elimizdiń barlyq óńirlerinde aýyl turǵyndarynyń tabysyn arttyrý. Aýyl turǵyndaryna mıkrokredıtter jyldyq 2,5%-dan aspaıtyn syıaqy mólsherlemesimen beriledi. 2023 jyldyń qorytyndysy boıynsha baǵdarlama aıasynda 12,2 mlrd teńgege 75,5 myń shaǵyn nesıe berilip, 12 myńnan astam jumys orny quryldy. Túrkistan oblysyna keletin bolsaq, ótken jyldy munda 3 256 mlrd teńgege 19,8 joba qarjylandyryldy, 3 413 jumys orny ashyldy. Kooperatıvter negizinde jeke qosalqy sharýashylyqtardy damytýǵa basymdyq berildi.
Baspasóz týry baǵdarlamasynda birinshi nysan Qarnaq aýylyndaǵy «Tájıtdın ata» AО́K broıler etin óndirý jobasy boldy. Onyń quny 71,6 mln teńge, «Aýyl amanaty» boıynsha oǵan 27,6 mln teńge bólingen. Joba jyl saıyn 50 tonna qus etin shyǵara otyryp, aýdany 15 sotyqtan aspaıtyn shaǵyn keńistikti barynsha paıdalanady. Bul sharýashylyq jerdi únemdi paıdalanýdyń úlgisi boldy. Aıta keteıik, «Tájıtdın atada» ónim óndirý jáne satý tizbegi saýatty qurylǵan, al qus etiniń kılogramy 1 500 teńgeden kóterme baǵamen satylady.
О́ńir úshin taǵy bir mańyzdy bastama − Talapty eldi mekenindegi «Ran» JK balyq ósirý jobasy. Onyń quny − 12 mln teńge, «Aýyl amanaty» baǵdarlamasy boıynsha 7 mln teńge qarjylandyryldy. Joba jetekshisi óz baqshasynda tórt basseın salyp, oǵan sazan shabaqtaryn jibergenin aıtty. Shabaqtar belgili bir jasqa jetkende satylady jáne óńirde balyq ónimderine suranys artady. Jobanyń boljamdy qýaty jylyna 20 tonna ónim, aldaǵy jyldary taǵy 15 basseın salý jáne osylaısha kásiporyndy keńeıtý josparlanǵan.
Baltakól aýylyndaǵy naýbaıhananyń basshysy Birjan Júnisov BAQ ókilderine óziniń jetken jetistikteri jaıynda aıtyp berdi. Onda kúnine 300-350 dana nan satylady. Kásipkerdiń aıtýynsha, ol «Aýyl amanaty» týraly estigende jumyssyz bolǵan jáne oǵan jergilikti atqarýshy organ qujattardy rásimdep qana qoımaı, bıznes-jospar jasaýǵa da kómektesken. Nátıjesinde aýyl turǵyny óziniń shaǵyn isin uıymdastyrý úshin 8 mln teńge nesıe aldy, negizgi qaryzdy tóleý kúzde bastalady. Ol nesıeni merziminen buryn jabýdy jáne taǵy odan da iri somany alýdy josparlap otyr. «Aýyl amanaty» baǵdarlamasynyń jańa erejesi fermerlerge kásibin keńeıtýge 29 mln teńge alýǵa múmkindik beredi.
Degenmen, naýbaıhana Baltakóldegi «Aýyl Amanatynyń» jalǵyz jobasy emes, alaqandaı aýylda «Alǵa-BAM» tary óńdeıtin zaýyty da bar. О́ıtkeni aýyl tary ósirýmen tanymal bolǵanymen, ony óńdeý úlken jobany qajet etetin. Qazir Alǵa-BAM zaýyty táýligine 5500 kelige jýyq tary óńdeıdi. Zaýytta sýsymaly ónimderdi quıýǵa jáne býyp-túıýge arnalǵan stanok, óndiristik jeli, dıirmen sekildi barlyq qajetti qural-jabdyqtar bar. Aıta keteıik, «Aýyl amanaty» jobasy aıasynda qarjylandyrylǵan nesıe qarajatynyń kólemi 20 mln teńgeni qurady.
Sonymen, jýrnalıster nazaryna mal sharýashylyǵy boıynsha eki joba usynyldy: biri angýs tuqymdy 15 bas IQM, ekinshisi sút baǵytyndaǵy 15 bas IQM satyp alyp, kásibin dóńgeletip otyr.
Aıta ketý kerek, baǵdarlama arqyly júzege asqan barlyq jobalar turǵyndardyń tabysyn arttyryp qana qoımaı, jalpy óńirge oń áser etip, aýyl sharýashylyǵyn damytýǵa septigin tıgizedi.
24 qańtarda «Aýyl amanaty» jobalary boıynsha baspasóz týry Qyzylorda oblysynda jalǵasady.