Qazaqstan Respýblıkasynyń Ǵylym jáne joǵary bilim mınıstrligi men Oksford ýnıversıteti arasynda kelisimge qol qoıyldy. Oǵan sáıkes Oksford ýnıversıtetinde endi qazaq tilin oqytýdy bastaý josparlanyp jatyr, dep habarlaıdy Egemen.kz mınıstrliktiń baspasóz qyzmmetine silteme jasap.
Ǵylym jáne joǵary bilim mınıstri men Qazaqstannyń jetekshi joǵary oqý oryndarynyń basshylarynan quralǵan Qazaqstan delegasııasy álemdegi eń bedeldi ýnıversıtetke bardy.
Is-sharanyń ekinshi bóliminde Bilim jáne ǵylym mınıstrliginiń basshysy Saıasat Nurbek brıtandyqtarǵa Qazaqstan Respýblıkasynyń Prezıdenti Qasym-Jomart Toqaevtyń tapsyrmasymen ázirlengen «Oxford Qazaq» sózdiginiń birinshi basylymyn tanystyrdy.
«Til – halqymyz úshin basty qundylyqtardyń biri. Búgin qazaq jáne aǵylshyn tilindegi Oxford Qazaq sózdigin tanystyra otyryp, biz jańa tarıhı beleske kóterilemiz. Sonyń arqasynda álem jurtshylyǵy bizdiń mádenıetimiz ben halqymyzdyń tarıhy týraly mol málimet biletin bolady. Biz qazaq tilin tek qaǵaz júzinde ǵana emes, memlekettik tildi damytýdy sıfrlandyrý arqyly belsendi túrde júzege asyramyz», dedi mınıstr.
Aıta ketý kerek, ótken jyldyń sońynda qazaqsha-aǵylshynsha Oxford Qazaq sózdigi jaryqqa shyqqan bolatyn. Alǵashqy basylym 1300 betten turyp, 60 myńnan astam sózdi qamtydy. Ol Ahmet Baıtursynov atyndaǵy Til bilimi ınstıtýtynyń mamandarynyń qatysýymen 4 jyl boıy qurastyryldy. Sáıkesinshe, onda eki tildiń leksıkasyndaǵy ózgerister jáne qazirgi mádenıet pen ǵylym salasyna qatysty sońǵy jańalyqtardyń engenin atap ketken jón.