28 qańtar kúni SpaceX jáne Tesla-nyń negizin qalaýshy kásipker Ilon Masktyń taǵy bir Neuralink neırotehnologııalyq kompanııasy alǵash ret adam mıyna ımplant (chıp) saldy, dep jazady Egemen.kz.
Bul jańalyqty mıllıarderdiń ózi H (tvıtter) paraqshasynda jarııalady.
«Birinshi adamǵa Neuralink ımplanty salyndy, operasııadan keıin qalpyna kelý prosesi jaqsy júrip jatyr», dep jazdy Ilon Mask.
Neuralink kompanııasynyń alǵashqy ónimi Telepathy dep atalady. О́nim smartfon men kompıýterdi oı arqyly basqarýǵa múmkindik beredi.
Ilon Mask mı ımplanty birinshi kezekte aıaq-qolynan aıyrylǵan adamdarǵa salynatynyn atap ótti.
Mıllıarder Neuralink jobasynyń negizin 2016 jyldyń shildesinde qalady. Jobanyń negizgi mindeti − adam mıyna ımplantasııalanatyn chıpter ázirleý. Onyń sózinshe mundaı neırondyq ınterfeıster adamzatty jasandy ıntellektige qarsy turýǵa jáne tehnologııany oı kúshimen basqarýǵa qabiletti etedi.
Aıta keteıik, Masktyń kompanııasy ótken jyldyń naýryz aıynda neırondyq chıpti mıyna erikti túrde saldyratyn adamdardy izdeýdi bastaǵan edi.