Táýelsiz Qazaqstan tarıhynda buǵan deıin 11 Premer-mınıstr bolǵan. Qazir olardyń arasynda áli shendi qyzmette júrgeni de, sottalyp ketkeni de bar, dep jazady Egemen.kz Massaget.kz saıtyna silteme jasap.
Sergeı Tereshenko Táýelsizdik alǵan 1991 jylǵy 16 jeltoqsannan bastap 1994 jylǵa deıin basqarǵan. Ol - Qazaqstan tarıhyndaǵy alǵashqy Premer-mınıstr. Sarapshy Aıbar Oljaevtyń sózine súıensek, Tereshenkonyń kezinde ekonomıka tórt jyl boıy qatarynan qulaǵan. Al Qazaqstan tarıhyndaǵy eń úlken quldyraý, mınýs 12 paıyz 1994 jyly bolǵan.
Saıasattaǵy jumysynan keıin Sergeı Tereshenko kásipkerlik qyzmetke ketken. Ol jańa óndirister ashyp, fermalar men sý elektr stansııalaryn salǵan. Ol byltyr 72 jasynda qaıtys boldy.
Ekinshi premer shetelde turady. Qazaqstan tarıhyndaǵy ekinshi Premer-mınıstr - Ákejan Qajygeldın. Ol 3 jyl, ıaǵnı 1994-1997 jyldar aralyǵynda Úkimet basshysy boldy. Sarapshy Aıbar Oljaevtyń pikirinshe, Qajygeldın - eldi mınýstan plıýske shyǵarǵan alǵashqy premer.
1998 jyly ol prezıdenttik saılaýǵa óz kandıdatýrasyn usyndy. Keıin partııalardyń quramyna ótip, tóraǵa qyzmetin de atqardy. Ashyq derekkóz málimetine súıensek, 1999 jyly oǵan halyqaralyq izdeý jarııalandy.
Sonymen qatar derekterde onyń 20 jyldan asa ýaqyt boıy Ulybrıtanııada turyp jatqany aıtylady. Degenmen burynǵy Úkimet basshysy áli kúnge buqaralyq aqparat quraldary arqyly Qazaqstan týraly pikirin bildirip turady.
Úshinshi premer de qaıtys bolǵan. Qazaqstan tarıhyndaǵy úshinshi premer-mınıstr - Nurlan Balǵymbaev. Ol 2015 jyly 68 jasynda Atyraý qalasynda qaıtys boldy.
Tórtinshi premer - qazirgi Prezıdent Qasym-Jomart Toqaev 1999-2002 jyldar aralyǵynda Premer-mınıstr qyzmetin atqardy. Toqaev 2019 jyly Prezıdent bolyp taǵaıyndaldy. Sarapshy Aıbar Oljaevtyń aıtýynsha, Qasym-Jomart Toqaev táýelsiz el tarıhynda ekonomıkanyń bir jyldyq ósý qarqynyn 10 paıyzdan asyrǵan alǵashqy premer boldy.
Besinshi premer eń az ýaqyt otyrǵan. 2002-2003 jyldar Úkimet basshylyǵyna Imanǵalı Tasmaǵambetov keldi.
Byltyr Imanǵalı Tasmaǵambetov Ujymdyq qaýipsizdik týraly shart uıymynyń bas hatshysy qyzmetine kiristi. Al buǵan deıin Reseıde elshi boldy.
Altynshy premer ShQO-ny da, Úkimetti de uzaǵyraq basqarǵan. Danıal Ahmetov 2003-2007 jyldar aralyǵynda Premer-mınıstr boldy.
Byltyr 16 maýsymda Danıal Ahmetov ShQO ákimi qyzmetinen bosatyldy. Ol 2014 jylǵy qarashadan bastap ShQO ákimi qyzmetine taǵaıyndalǵan edi. Danıal Ahmetov qazir jeńil atletıka federasııasynyń prezıdenti bolyp otyr.
Jetinshi premer sottalyp ketken. Kárim Másimov 2007-2012, 2014-2016 jyldar aralyǵynda Qazaqstan Úkimetin basqardy. Alaıda ol Qańtar oqıǵasynan keıin sottaldy. Ulttyq qaýipsizdik komıtetiniń basshysy qyzmetin atqarǵan Kárim Másimovke byltyr 24 sáýirde Astananyń qylmystyq ister jónindegi mamandandyrylǵan aýdanaralyq soty úkim shyǵarǵan bolatyn.
Sot isti «Asa qupııa» degen belgimen qarady. Kárim Másimov QR Qylmystyq kodeksiniń 175-babynyń 1-bóligi, 179-babynyń 3-bóligi, 362-babynyń 4-bóliginiń 3-tarmaǵy boıynsha kináli dep tanylyp, 18 jyl bas bostandyǵynan aıyryldy. Sonymen birge memlekettik qyzmette ómir boıy qyzmet ete almaıdy jáne múlki tárkilenedi. Kárim Másimov general sheni men memlekettik nagradalarynan da aıyryldy.
Segizinshi premer de jazasyn ótep shyqqan. Serik Ahmetov 2012-2014 jyldar aralyǵynda Premer-mınıstr boldy.
Ahmetov te sotty bolǵan edi. Eks-premer mınıstrge qatysty is 2015 jyldyń 10 tamyzynda bastalǵan bolatyn. Nátıjesinde Serik Ahmetov 10 jylǵa sottaldy.
Al birneshe aıdan soń Serik Ahmetovtiń keltirilgen shyǵyndy ótegeni - qazynaǵa 430 mıllıon teńgeden asa aqsha tólegeni belgili boldy. Keıinirek eks-premerdiń jaqyndary men dostary memleketke taǵy eki mıllıard teńge tóledi. Sot osynyń barlyǵy eskere otyryp, sottalǵan Serik Ahmetovtiń jazasyn 10 jyldan 8 jylǵa qysqartty. Osylaısha Serik Ahmetov 2017 jyldyń 21 qyrkúıeginde bostandyqqa shyqty.
Toǵyzynshy premer shendi qyzmette. Baqytjan Saǵyntaev 2016-2019 jyldar aralyǵynda Úkimetti basqardy. Jýyrda Baqytjan Saǵyntaev Eýrazııalyq ekonomıkalyq komıssııa alqasynyń tóraǵasy qyzmetine saılandy. Bul týraly RF prezıdenti Vladımır Pýtın Joǵary Eýrazııalyq ekonomıkalyq keńeste aıtty. Buǵan deıin Saǵyntaev Almaty qalasynyń ákimi qyzmetin atqardy.
Onynshy premer shetelde jıi kózge túsip júr. Asqar Mamın 2019-2022 jyldar aralyǵynda Úkimetti basqardy. Qazir ol áleýmettik jeli arqyly shetelden jıi kózge túsedi. Máselen, buǵan deıin Tashkenttegi marapattaý saltanattarynyń birinde júrdi.
Al keıin fýtbol federasııasynyń eks-prezıdenti Ádilbek Jaqsybekov pen eks premer-mınıstr Asqar Mamın Ystanbulda ótken Chempıondar lıgasynda júrgen jerinen kózge tústi. Odan keıin taǵy da Premer-mınıstrdiń Túrkııa elinde júrgeni jaıly vıdeo áleýmettik jelide tarap ketti.
On birinshi Premer-mınıstr - Álıhan Smaıylov. Ol 2022-2024 jyldar aralyǵynda Úkimetti basqaryp, keshe otstavkaǵa ketti.