Elordada Memleket basshysy Qasym-Jomart Toqaevtyń tóraǵalyǵymen Úkimettiń keńeıtilgen otyrysy ótip jatyr. Búgingi jıynda Úkimettiń ótken jyly atqarǵan jumysy qorytyndylanyp, jańa maqsattar men mindetter aıqyndalady, dep habarlaıdy Egemen.kz Aqorda baspasóz qyzmetine silteme jasap.
«Búgin biz byltyr atqarylǵan jumysty qorytyndylaımyz. Sondaı-aq aldaǵy kezeńniń basty mindetterine toqtalýymyz kerek. Jalpy, ótken jyly ekonomıkamyz 5,1 paıyzǵa ósti. Eń bastysy, elimizdiń damý qarqyny báseńdegen joq. Aldyńǵy Úkimet osy baǵytta biraz jumys istedi. Keshe men burynǵy Premer-mınıstr Álıhan Smaıylovqa alǵysymdy bildirdim. Biraq qazir jaıbaraqat otyrýǵa bolmaıdy, sebebi aldymyzda aýqymdy jumys tur. Sondyqtan Úkimettiń jumysyna jańa serpin berý qajet», dedi Qasym-Jomart Toqaev.Osy tusta Prezıdent Úkimet aldynda turynǵan negizgi maqsattarǵa toqtala ketti.
«Negizgi maqsat – barshańyzǵa belgili. Biz 2029 jylǵa qaraı ekonomıkamyzdyń kólemin 450 mıllıard dollarǵa jetkizýimiz kerek. Iаǵnı, naqty meje bar. Endi tek jumys isteý qajet. Bul – elimizdiń jalpy ishki ónimi jyl saıyn keminde 6 paıyzǵa ósýi kerek degen sóz. Sondaı-aq makroekonomıkalyq kórsetkishtermen qatar halyqtyń naqty tabysy da qarqyndy túrde artýy kerek. Bul – óte mańyzdy mindet. Bir sózben aıtqanda, bizge shyn máninde sapaly damý qajet. Sondyqtan árbir qadamdy jan-jaqty, muqııat oılastyryp, batyl áreket etý kerek», dedi Memleket basshysy otyrys barysynda.