Senat Tóraǵasy Máýlen Áshimbaev Palata otyrysynda naryqqa jeke kompanııalardy tartý qajettigi týraly oıyn aıtty. Mundaı usynys senatorlardyń «Qazaqstan temir joly» AQ qyzmeti týraly depýtattyq saýalyna Kólik mınıstri Marat Qarabaevtyń bergen jaýabyna baılanysty aıtyldy, dep habarlaıdy Egemen.kz.
Máýlen Áshimbaev qazirgi tańda jumys kólemi men júkteme artyp otyrǵanyn atap ótti. Sondyqtan QTJ-nyń búgingi jumys kóleminiń ózi jetkiliksiz ekeni baıqalýda. Osyǵan baılanysty bul iske úshinshi tarapty – jeke kompanııalardy tartý qajettiligi týyndap otyr. Magıstraldyq temir jol jelilerin jańǵyrtý jáne salanyń basqa da ózekti máselelerin sheshý úshin ınvestısııa salý qajet.
«Qazir «Qazaqstan temir joly» kompanııasyndaǵy túıtkilderge qarap, ınvestısııa salýdy jalǵastyrý kerek ekenin kórip otyrmyz. Vagondar men lokomotıvterdi satyp alýǵa, magıstraldyq temirjol jelilerin jańǵyrtýǵa ınvestısııa qajet. Keı jerde tasymaldaý kólemi kóbeıip, QTJ úlgermeı qalyp jatyr. Árıne, kompanııa aýqymdy jumys atqarýda. Lokomotıvter satyp alynyp, vagondar jańartyldy. Alaıda, sonyń ózi jetkiliksiz bolyp otyr. Iаǵnı, eger resýrs jetpese, kompanııa bárin jańartyp úlgermese, onda qosymsha kúsh tartý kerek degen sóz. Negizgi mán de osy. Qosymsha kúsh degen – jeke sektor, jeke kompanııalar. Bul týraly ne aıtasyzdar? Ázirge kórip-estip otyrǵanymyzdaı, bári memlekettik bolady. Tipti jańa eki kompanııaǵa da memleket qatyspaq. Sondyqtan salaǵa jeke kompanııalardy tartý jónindegi strategııa qandaı?», dedi Máýlen Áshimbaev Kólik mınıstri Marat Qarabaevtyń jaýabyn tyńdaı kelip.
Senat Tóraǵasy magıstraldyq temirjol jelileri salasyn reformalaý boıynsha eki satyly tásilge nazar aýdaryp, ol salany jańǵyrtý qarqynyn kesheýildetýge ákelýi múmkin ekenin aıtty.
Mınıstr óz kezeginde reformalaýdyń eki satyly tásili ózgerister qarqynyn taldaıtyn testileýdiń bir túri ekenin atap ótti. Marat Qarabaev jeke kompanııalardy tartýǵa qatysty Palata Tóraǵasynyń usynysyna qoldaý bildirip, osyndaı ózara is-qımyl kózdelip otyrǵanyn naqtylady.
Palata otyrysynda Kólik mınıstri Marat Qarabaevtyń «Qazaqstan temir joly» ulttyq kompanııasy» AQ qyzmeti týraly senatorlardyń depýtattyq saýalyna aýyzsha jaýaby tyńdaldy. Onda eksport tasymalynyń buzylýy men básekelestikte teńsizdik jaǵdaıynyń týyndaýy depýtattardyń narazylyǵyn týdyrǵan edi.
Otyrysqa Básekelestikti qorǵaý jáne damytý agenttiginiń, Ulttyq ekonomıka mınıstrliginiń jáne «Qazaqstan temir joly» ulttyq kompanııasy» AQ basshylary da qatysty.