Fýtboldan ÝEFA Chempıondar lıgasynyń 1/8 fınaldyq saıystarynyń kezekti oıyndary Italııanyń Mılan jáne Nıderlandtyń Eındhoven qalalarynda ótti.
Apennın túbeginde Mılannyń «Interi» men Madrıdtiń «Atletıkosy» uzaq ýaqyt boıy bir-biriniń qaqpa kiltin taba almaı, ábden ábigerge tústi. Basymdyq alań ıeleri jaǵynda boldy. Olar dopqa kóbirek ıelik etip, qarsylastarynyń mysyn baspaqshy boldy. Biraq Dıego Sımıoneniń komandasy ádettegideı qorǵanysqa kóp kóńil bólip, ıtalııalyq klýbtyń oıynshylaryn óz aıyp alańdaryna jolatpaýǵa tyrysty. Ár qaýiptiń betin qaıtarǵan kezde qarymta shabýylǵa da júgindi. Desek te «Ańdyǵan jaý almaı qoımaıdy» demekshi, ýaqyt oza «Inter» kózdegen maqsatyna qol jetkizdi. 79-mınýtta Laýtaro Martınestiń baǵyttaǵan dobyn qaqpashy Iаn Oblak keri qaıtarǵanymen, lezde sol jerden tabyla qoıǵan Marko Arnaýtovıch nysanany dál kózdedi – 1:0. Bul esep matchtyń sońyna deıin saqtaldy.
Nıderlandta ótken kezdesýde qonaqtar alǵashqy bolyp esep ashty. 24-mınýtta «Borýssııanyń» shabýylshysy Donıell Malen mergendik tanytty. Úzilisten keıin «Eındhovenniń» kapıtany Lıýk de Iong 11 metrlik núkteden múlt ketken joq – 1:1.