Maıqaıyńnyń jalǵyz qubyry jaryldy

«21 aqpan kúni Baıanaýyl aýda­nynyń Maıqaıyń kentine sý jetkizetin dıametri 1020 mm sýyq sýmen jabdyqtaý qubyrynda aqaý anyqtaldy. Aqaýdyń ýchaskesi «Ekibastuz qalalyq sý arnasy» memlekettik kom­mýnaldyq kásipornyna qaras­ty ekinshi kótergish sorǵy­synan 27 km qashyqtyqta ornalasqan. Oqıǵa ornyna óńir basshysy Asaıyn Baıhanov, Ekibastuz qalasynyń jáne Baıanaýyl aýda­nynyń basshylary, son­daı-aq oblystyq tótenshe jaǵdaı­lar departamentiniń bas­shy­sy baryp, jedel shtab uıym­dastyryldy. Aqaýdyń sebe­bin anyqtaý jáne joıý jumys­tary «Ekibastuz qa­lalyq sý arnasy» MKK kúsh­terimen júr­gizilip jatyr. Jóndeý jumys­taryna 30 adam jáne 10 birlik mamandandyrylǵan tehnıka jumyldyryldy. Sondaı-aq oqıǵa ornynda Pavlodar ob­lysynyń tótenshe jaǵdaılar kúshteri men «Maıqaıyńaltyn» AQ ma­mandary jumys istep jatyr», dep habarlady oblys ákiminiń baspasóz qyzmeti.

Kenttegi aýyzsý qubyry «Maıqaıyńaltyn» AQ-nyń senim­gerlik basqarýyna berilgen. Kásiporynnyń bas dırektory Qýanysh Botınniń aıtýynsha, Ekibastuz qalasynan úlken qu­byr arqyly aǵyp keletin aýyz­sý keshe túski ýaqytta múlde joǵalyp ketken.

«Apat qubyrdyń Ekibastuz qalasy aýmaǵynda bolyp otyr. Jalpy, sýdyń qubyrdaǵy aqaý­dan ysyrap bolýy 19 aqpan­nan beri baıqalǵan. Negizgi aqaý orny keshe ǵana tabylǵan tárizdi. Búgin túnde oqıǵa ornyna baryp, kásiporynnyń mamandary men tehnıkalaryn kómekke ju­myldyrdyq. Qazir kentte aýyz­sý boıynsha biraz shekteý engizildi. «Maıqaıyńaltyn» AQ boıynsha sýdy meılinshe az paıdalanýǵa tapsyrma berdik. О́zge jergilikti kásiporyndar asa kóp tutyna qoı­maıdy. Jaǵ­daı turaqtalǵansha shekteýler kúshinde saqtalady», dedi Qýa­nysh Botın.

Maıqaıyń kentiniń turǵyn­dary kúnine 1 myń tekshe metr aýyz­sý tutynyp kelgen. Keshe qysymnyń tómendeýine baılanysty «Maıqaıyńaltyn» AQ sý tasıtyn mashınalardy ju­myldyrdy. Kentke jaqyn jerde skvajına bar, jetpegen sýdy sol jerden alady. Al kentti jylýmen qamtyp turǵan qazandyq táýligine 200–250 tekshe metr sý tutynady.

Negizi sý qubyry jolaı «Bo­gatyr-Kómir» AQ óndiristik nysandaryn basyp ótedi. Aqaýǵa baılanysty kenishke sý berý de ýaqytsha toqtatyldy. Pavlodar oblysy ákiminiń baspasóz qyzmeti habarlaǵandaı, kenishtegi kómir óndirisi toqtamaǵan. Sebebi oǵan sýdyń qajeti joq. Sharýashylyq qajettilikter úshin sýdy jetkizý uıymdastyryldy.

Atalǵan sý jelisi 1996 jyly salynǵan jáne búgingi tań­da aı­tarlyqtaı tozyǵy jet­ken. Qu­byrdy bıyl rekon­strýk­­sııalaý josparlanypty. Qa­zirgi kezde konkýrs ótkizilip, Al­matyınjstroı» JShS mer­diger uıym retinde tań­dal­ǵan. Ju­mystardy kóktem-jaz keze­ńinde bastaý uıǵarylyp otyr.

Maıqaıyń kenishi men «Bogatyr-Kómir» AQ-ǵa sý jet­kizetin magıstraldy qubyr «Ekibastuz qalalyq sý arnasyna» tıesili. Al kent ishindegi sý qu­byrlaryna joǵaryda aıt­qandaı «Maıqaıyńaltyn» AQ jaýap beredi.

Altyn kenishin jaǵa­laı or­nalasqan kentte ortalyq­tan­dyrylǵan aýyzsýdy tutynatyn 2500 jeke abonent bar. О́ńirlik ta­bıǵı monopolııalardy retteý de­partamentiniń basshysy Nur­lan Nurmuratovtyń aıtýynsha, jergilikti jeke tutynýshylar úshin tarıf quny 130,58 teńge turady. Bıýdjettik uıymdar tekshe metrine 779,01 teńge tólese, ózge tutynýshylar úshin tarıf baǵasy – 754,1 teńge.

Pavlodar oblysy,

Baıanaýyl aýdany,

Maıqaıyń kenti