Elordada qalyń qar jaýyp, kommýnaldyq qyzmetter kúsheıtilgen rejimde jumys istep jatyr. Osyǵan baılanysty kolledj stýdentteri qart kisilerdiń aýlasyn qardan tazalap berip, «Igi ister marafony» dástúrli aksııasyn ótkizdi.
Aksııanyń maqsaty – qarttar men erekshe qajettiligi bar qala turǵyndaryna kómek kórsetý. Sharapaty mol is-sharaǵa 50 kolledj stýdenti atsalysty. «Kolledj stýdentteri men túlekteri qaýymdastyǵynyń zańdy tulǵalar birlestiginiń» tóraǵasy Ańsar Qaıyrjanovtyń aıtýynsha, bul aksııa jyl saıyn ótkiziledi.
– Biz aýa raıynyń qolaısyzdyǵyna qaramastan, kommýnaldyq qyzmetshilerge jıi kómektesemiz. Sonymen qatar olarǵa ystyq shaı jáne túrli táttiler taratamyz. Elordalyq jastar uıymdaryn «Igi ister marafonyna» qatysýǵa shaqyramyn, – dedi ol.
Sonymen qatar elordalyq eriktiler kóshelerdiń qaryn kúrep júrgen kommýnaldyq qyzmet mamandaryna jyly sharftar toqyp berdi. Osynaý is-sharaǵa áleýmettik kásipker Rahıma Muqysheva kómekke keldi.
«Bul alǵashqy qaıyrymdylyq aksııa emes, buǵan deıin bizde «Quraq-kórpe» stılindegi eko-shyrsha qurý jobasy bolǵan. Osylaısha, biz barlyq turǵyndar men kásipkerlerdi jaqsylyq jasaýǵa shaqyramyz», dedi R.Muqysheva.
Bir aı boıy 6-70 jas aralyǵyndaǵy qala turǵyndary 100-den asa jyly sharf toqydy. Qaıyrymdylyq aksııasyna 70-ke jýyq erikti qatysty.
«Bizge jyly sharftar úlestirdi. Bul, ásirese, aıazdy kúnderi qajet. Qamqorlyq tanytyp, qolushyn sozyp jatqan eriktilerge alǵysymyz zor», dedi jol qyzmetkerleriniń biri Qaırat Ahmetov.
«О́zgeniń ıyǵyna japqan shapan, ózińniń de júregińdi jylytady» deıdi ejelgi danalyq. Endeshe, qaıraty ystyq, aqyly nurly, júregi jyly jastarymyzdyń isine ıgilik tileımiz.