Elordada Oqý-aǵartý mınıstrligi, Respýblıkalyq ǵylymı-pedagogıkalyq kitaphanasy jáne Astana qalasy Bilim basqarmasynyń uıymdastyrýymen aýqymdy is-shara ótti.
Memleket basshysy Q.Toqaevtyń «Oqýǵa qushtar mektep» jobasyn, «Balalar kitaphanasy» baǵdarlamasyn júzege asyrý mańyzdy sharýanyń biri. Osyǵan oraı osy jyldyń qańtar aıynda Almaty qalasynda Oqý-aǵartý mınıstri Ǵ.Beısembaev pen Mádenıet jáne aqparat mınıstri A.Balaevanyń qatysýymen «Shyǵarmashylyq ıntellıgensııa - Qazaqstan balalaryna» atty kezdesý ótken edi. Osy basqosýda júktelgen tapsyrmaǵa oraı 26 aqpanda Astanadaǵy №59 mektep-lıseıde bas qaladaǵy mektep dırektorlary, muǵalimder, ata-analar, kitaphanashylar balalar basylymdarynyń jetekshilerimen dıdarlasyp, basylym men oqyrman arasyndaǵy túıtkildi máseleni talqyǵa saldy.
Is-sharaǵa jazýshy Tolymbek Ábdiraıym, quramyna 11 basylym kiretin, sonyń ishinde balalarǵa arnalǵan «Ulan», «Drýjnye rebıata» gazetteri, «Aq jelken», «Baldyrǵan» jýrnaldary qaraıtyn «Qazaq gazetteri» JShS Bas dırektorynyń orynbasary – Almaty basylymdarynyń jetekshisi Dýman Anash, «Aıgólek» jýrnalynyń bas redaktory aqyn Qymbat Ábildaqyzy, «Móldir bulaq» jýrnalynyń bas redaktory aqyn Dáýletbek Baıtursynuly jáne ózge de balalar basylymdarynyń ókilderi sóz alyp, jas oqyrman men baspasóz arasyndaǵy baılanys alshaqtap bara jatqanyna alańdaýshylyq bildirdi.
«Eki-úsh jyl buryn ótken Jazýshylar odaǵynyń quryltaıynda Oljas Súleımenov «bizdiń táýelsizdik alǵanymyzǵa 30 jyl boldy, osy 30 jyldyń ishinde biz kitap oqýdy doǵardyq» degen edi. Shyndyqty moıyndaý kerek, táýelsizdikten beri qaraı rasynda da oqyrman gazet-jýrnal, kitap oqýdan ajyrap qaldy. Besikten bosap shyqqan búldirshinniń ózi smartfonǵa úńiletin qazirgi qoǵamda jas oqyrmandy balalar basylymymen qaýyshtyryp, baılanys jibin shıratý mańyzdy sharýa. Búgingi basqosýdyń kózdegeni de osy jaıt», dedi halyqaralyq Alash ádebı syılyǵynyń laýreaty T.Ábdiraıym.
Qymbat Ábildaqyzy mektep dırektorlary men muǵalimderge hám ata-analarǵa jetkinshekterdi balalar basylymymen dostastyrýǵa úndedi. Dáýletbek Baıtursynuly byltyr jeti oblysty aralap, oqyrmandarmen júzdesýde túrli kedergilerge kezikkenin, bul túıtkildi Oqý-aǵartý mınıstri Ǵanı Beısembaevqa da eskertkenin aıtty.
«Mektep pen balalar basylymdary arasyndaǵy baılanystyń shylbyry úzilgeli tur. Úzilmeli jip qıylyp, oqyrman azaısa, balalar basylymdary jabylady», dedi D.Baıtursynuly.
Dýman Anash oqyrmandy qyzyqtyryp, talǵamyna tatıtyn tushymdy dúnıeler usyný basty murat ekenin jetkizdi. Respýblıkalyq «Aq jelken» jýrnalynyń ujymy oqyrmandar arasynda túrli baıqaý uıymdastyrý arqyly da oqýshy qaýymnyń údesinen shyǵyp kele jatqanyn jetkizdi.
Búgingi kúnde elimizde 30-ǵa jýyq balalar basylymdary jaryq kóredi. Barlyǵy derlik tómen tırajben taralady. Elimizdegi 7 myńnan astam mekteptiń oqýshylary merzimdi basylymdarmen dostassa, bul olqylyqtyń orny tolar edi desken qalamgerler pedagogterge orasan senim artatynyn jetkizdi. Jıynda balalar arasynda oqý mádenıetin nyǵaıtýdyń máselesi de qamtyldy.
«Oqýǵa qushtar mektep» jobasy, «Balalar kitaphanasy» baǵdarlamasy aıasynda jańa ıdeıalar jáne tájirıbelik usynystar aıtyldy. Balalar basylymynyń ókilderi mektep kitaphanalaryna jasóspirimderge arnalǵan gazet-jýrnaldardy jazdyrtý arqyly keleshek urpaqqa kórkem shyǵarmalardy oqytýdy qolǵa alsaq degen usynys bildirdi.