Senattyń Agrarlyq máseleler, tabıǵatty paıdalaný jáne aýyldyq aýmaqtardy damytý komıteti Qyzylorda oblysynda bolyp, «Sý resýrstary: turaqty sýmen qamtamasyz etý máseleleri men perspektıvalary» taqyrybynda kóshpeli otyrysyn ótkizdi, dep jazady Egemen.kz joǵarǵy Palatanyń baspasóz qyzmetine silteme jasap.
Senat komıtetiniń tóraǵasy Álı Bektaev Memleket basshysy Úkimettiń keńeıtilgen otyrysynda sý resýrstaryna qol jetkizý máselesiniń mańyzdylyǵyna erekshe toqtala kelip, búgingi tańda Túrkistan jáne Qyzylorda oblystarynyń sýarmaly jerleri asa qaýipti jaǵdaıda ekenin atap ótkenin eske saldy.
«Jaǵdaıdy jaqsartý maqsatynda, onyń ishinde ylǵal kóp qajet etetin daqyldardyń egistigin ońtaılandyrý, qurǵaqshylyqqa tózimdi aýyl sharýashylyǵy daqyldaryna kóshý jáne sý únemdeý tehnologııasyn engizý úshin naqty sharalar talap etiledi. Sý qatynastary salasyndaǵy basym maqsattar men mindetterge qol jetkizý úshin memlekettik bılik organdary qyzmetiniń tıimdiligin arttyrý jáne úılestirý máselelerin odan ári damytý qajet bolyp otyr», dedi Álı Bektaev.
Senator Janbolat Jórgenbaev kóshpeli otyrysta qazirgi Sý kodeksinde sýdy únemdeý jáne sýdy únemdi paıdalanýdy yntalandyrý tetikteri eskerilmegenin synǵa aldy.
«Salaaralyq ózara is-qımyldyń zańnamalyq naqty tetikteriniń bolmaýy sý tapshylyǵyn azaıtý jáne olardyń iske asýyn baqylaý jónindegi sharalardy júıeli túrde josparlaýǵa múmkindik bermeıdi. Qoldanystaǵy zańnama sý resýrstaryn paıdalaný jáne qorǵaý salasyndaǵy tıimdi memlekettik saıasatty iske asyrýdy qamtamasyz etý múmkindigi tómen. Odan basqa, ınstıtýsıonaldyq qurylym men basqarý júıesi odan ári damytýdy jáne olardyń tıimdiligin arttyrýdy talap etedi», dedi J.Jorgenbaev.
Senatorlar sý sharýashylyǵy ahýalymen tanysý maqsatynda Qyzylorda sý toraby, «Áıtek» sý toraby, «Qyzylorda sý júıesi» kásiporny jáne «Altyn Orda» kúrish óndirý zaýytynda boldy.
Kóshpeli otyrystyń qorytyndysynda qatysýshylar Úkimetke joldanatyn tıisti usynystaryn tııanaqtady.