Qarýly kúshter jasaǵynyń balalary «Baldáýren» respýblıkalyq oqý-saýyqtyrý ortalyǵynyń fılıaldaryna bardy. Olar arnaıy bólimshelerde úsh apta boıy mádenı jáne saýyqtyrý is-sharalarynan bólek mektep baǵdarlamasy boıynsha bilim alady. Mundaǵy maqsat – keleshek býynnyń boıyna áskerı-patrıottyq tárbıeni sińirý.
Keıingi jyldary áskerı salada boı kórsetken máseleniń biri – patrıottyq tárbıede júıeli tásildiń bolmaýy. Túıtkildiń tıimdi sheshimi retinde byltyr Memleket basshysy Qasym-Jomart Toqaevtyń tapsyrmasymen Qorǵanys mınıstrligi 2030 jylǵa deıingi arnaıy tujyrymdamasyn ázirlegen-di. Qujatta tórt negizgi mazmundyq uǵym bar. Olar: tárbıe, bilim, patrıotızm jáne Otandy qorǵaý.
«Jastarǵa áskerı-patrıottyq tárbıe berý birlik pen turaqtylyqtyń, ádildik pen yntymaqtastyqtyń, zań men tártiptiń, senim men jaýapkershiliktiń ulttyq qundylyqtaryna negizdelýge tıis. Bul – Jańa Qazaqstannyń qurylýynyń kórinisi. Eń aldymen, jeke tulǵanyń eń mańyzdy qasıetteriniń biri – onyń jeri men eline degen qurmet sezimi baǵalanýy kerek. Áskerı-patrıottyq tárbıe úderisiniń negizgi lokomotıvi eldiń Qarýly kúshteriniń Ulttyq áskerı-patrıottyq ortalyǵy men bilim berý mekemeleri», delingen qujatta.
Elimizde búginde áskerı-patrıottyq klýbtardyń sany 9 myńǵa jýyqtaıdy. Qozǵalys tárbıelenýshileriniń sany 260 myńnan asyp jyǵylady. Jyl saıyn «Aıbyn» áskerı-patrıottyq jastar jıyny da ótkiziledi. Oǵan ár kezeńde eki myńnan astam áskerı-patrıottyq klýb, sondaı-aq 55 myńnan astam bala qatysady.
Sondaı-aq Qorǵanys jáne Oqý-aǵartý mınıstrliginiń birlesken «Baldáýren» ortalyǵynda bıyl myńnan astam bala áskerı-patrıottyq tárbıeden ótedi. Taıaýda ǵana jasóspirimderdiń birazy Túrkistan, Shýchınsk jáne Balqash, Qonaev qalalaryna bardy. Bul – Qorǵanys mınıstri, general-polkovnık Rýslan Jaqsylyqov pen Oqý-aǵartý mınıstri Ǵanı Beısembaevtyń bıyl qańtar aıynda ótken kezdesýi kezinde qol jetkizilgen ýaǵdalastyqtyń nátıjesi.
– Kelisim aıasynda jastarǵa áskerı-patrıottyq tárbıe berýdi jetildirýdiń birlesken jospary jasaldy jáne keıinnen bekitildi. «Baldáýren» respýblıkalyq oqý-saýyqtyrý ortalyǵynyń fılıaldarynda áskerı qyzmetshiler men Qarýly kúshter qyzmetshileriniń balalaryna kvota bólý týraly ýaǵdalastyqqa qol jetkizildi. Balanyń tárbıesi besikten bastalady deıdi. Sondyqtan yntymaqtastyq áskerge shaqyrylǵanǵa deıingi jastarmen jumys isteýge baǵyttalǵan. Jalpy, qoǵamnyń áskerge degen jańasha kózqarasyn qalyptastyrý, áskerı istiń negizderin zerdeleý boıynsha tájirıbelik sabaqtardy qamtıtyn tıisti oqý baǵdarlamasy engizilip otyr. «Jas sarbaz», «Smart sarbaz» synyptary ashylady, basqa da is-sharalar josparlanady. Áskerı-patrıottyq klýbtardyń tárbıelenýshileri úshin biryńǵaı nysandy engizý máselesi sheshilip keledi. Osy is-sharalardyń barlyǵy 2030 jylǵa deıingi jastardy áskerı-patrıottyq tárbıeleý tujyrymdamasyn iske asyrýǵa qyzmet etedi, – dedi Balqash qalasyndaǵy «Baldáýren» RBBO fılıaly dırektorynyń oqý-tárbıe jumysy jónindegi orynbasary Tileýhor Bıtileýova.
Mundaı demalysqa birinshi kezekte shalǵaıdaǵy garnızondarda áskerı qyzmet ótkeretin, tolyq emes jáne kópbalaly otbasylarda tárbıelenetin áskerı qyzmetshiler men azamattyq personaldyń balalary jiberildi. Olardyń densaýlyǵy basty nazarda.
Aıta keteıik, mınıstrlikterdiń birlesken josparynda «Baldáýren» RQQ vedomstvolyq tıesililigine, shtat kestesine, «Altyn Emel» kesheniniń ınfraqurylymyn jetildirýge, jóndeý jumystaryn júrgizýge, sport qalashyǵyn jáne aýdıtorııa jabdyqtaryn turǵyzýǵa qatysty birqatar uıymdastyrý is-sharasyn ótkizý kózdelgen.