Elimizge shetelden ákelinetin avtokólikterdi alǵashqy esepke qoıý men ýtılızasııalyq tólemniń shekten tys joǵary bolýy el turǵyndaryn zańdy aınalyp ótetin túrli amaldarǵa barýǵa ıtermelep jatyr. Osy jolda keıbiri arzan aqshaǵa jasap beremin degen alaıaqtardyń quryǵyna túsedi. Aqtóbede bolǵan oqıǵa – sonyń bir dáleli.
Polısııa bólimine jergilikti turǵyn belgisiz er adam alaıaqtyq jolmen odan 300 myń teńge alyp, jaqyn shetelden ákelingen avtokólikti esepke qoıýǵa kómektesýge ýáde bergenin, alaıda ýádesin oryndamaǵanyn aıtyp aryzdanǵan. Jedel-izdestirý is-sharalarynyń nátıjesinde tártip saqshylary kúdiktini anyqtap ustady. Ol Mańǵystaý oblysynyń 18 jastaǵy turǵyny bolyp shyqty. Kúdikti óz kinásin moıyndady.
Qazirgi ýaqytta ustalǵan adamnyń taǵy eki epızodqa qatysy bary anyqtalyp otyr. Alaıaqtyq fakt boıynsha sotqa deıingi tergeý bastaldy. Kúdikti ýaqytsha ustaý ızolıatorynda otyr.
Aqtóbe oblysynyń polısııa departamenti halyqty shetelden ákelingen avtokólikti az aqshaǵa esepke qoıyp beremin degen qyzmet túrlerinen bas tartýǵa shaqyrady. Degenmen alǵashqy esepke qoıý men ýtılızasııalyq tólem shekten tys kóp bolyp turǵanda mundaı qylmystardyń tyıylýy ekitalaı ekeni ras. О́ıtkeni álemniń basqa eshbir elinde kezdespeıtin osyndaı «tólemder» saldarynan shetelden satyp alynǵan kóliktiń baǵasy eki eselenip ketedi. Al muny halyqtyń kóp bóliginiń qaltasy kótere bermeıdi. Sondyqtan olar zańdy belshesinen basatyn álgindeı qıturqy joldarǵa baratyny belgili.