Jýyrda Ishki ister mınıstrligi baǵdarshamnyń sary túsine baılanysty jańa jol erejesin jarııalady. Halyq arasynda osy ózgeriske baılanysty túrli saýal týyndap jatyr. Sonda budan bylaı sary túske ótýge de baǵdarshamnyń qyzyl túsi sekildi tyıym salyna ma?
Bul suraqqa IIM M.Esbolatov atyndaǵy Almaty akademııasy ákimshilik-quqyqtyq pánder kafedrasy basshysynyń orynbasary, polısııa podpolkovnıgi Ásem Qyrǵyzbekqyzy jaýap berip, jańa erejeniń mánin túsindirdi.
– Jol júrý erejeleriniń 5-taraýy 24-tarmaǵynyń 3-tarmaqshasyna sáıkes baǵdarshamnyń sary sıgnaly qozǵalysqa tyıym salady. Buǵan deıin baǵdarshamnyń sary sıgnaly júrgizýshige qozǵalysyn aıaqtaýǵa múmkindik beretin. Alaıda júrgizýshiler bul normany durys paıdalanbaǵandyqtan, qıylystarda sonyń kesirinen jol-kólik oqıǵalary jıi tirkeledi. Sondyqtan mundaı quqyq buzýshylyqtardy endi beınebaqylaý kameralary avtomatty rejimde tirkep, sary tús janǵanda ótip ketkender Ákimshilik quqyq buzýshylyqtar týraly kodeksine saı jaýapkershilikke tartylady.