Elimizde qasat qardyń kóbesi sógilip, Jer-ananyń baýry býsana bastady. Alaıda alty aı jaýǵan qardan ońaılyqpen qutylmasymyz anyq. О́zender kemerinen asyp, qyzyl sý qyrǵa tasyp jatyr. Tótenshe jaǵdaılar mınıstrliginiń málimetine súıensek, 217 eldi meken sý basý qaýpi bar aýmaqta ornalasqan.
Keshe osyǵan oraı Ortalyq kommýnıkasııalar qyzmeti alańynda baspasóz jıyny ótti. Jıynda Tótenshe jaǵdaılardyń aldyn alý basqarmasynyń ókili Altaı Myrzabaev, Tótenshe jaǵdaılardy joıý departamenti bastyǵynyń mindetin atqarýshy Jomart Asqarov, «Qazgıdromet» RMK bas dırektorynyń birinshi orynbasary Serik Saırov, Kólik mınıstrligi Avtomobıl joldary komıteti tóraǵasynyń orynbasary Ǵalymjan О́tenbaev qatarly quzyrly oryndardyń basshylary baıandama jasady.
«Eldegi sý tasqynynyń qaýpi búginde salystyrmaly túrde turaqty. Eldi mekenderde sý aıdaý jáne qar shyǵarý, sý burý arnalaryn tazartý jumystary qolǵa alynǵan. Sý tasqyny jaǵdaıyna táýlik boıy tekseris júrgizilip jatyr. Naýryzdyń birinshi onkúndiginde eldiń shyǵys jáne ońtústik aımaqtarynda bir mezgilde qatty jaýyn-shashyn men aýa temperatýrasy kóterildi», deıdi Altaı Myrzabaev.
Departament bastyǵynyń sózine sensek, ázirge tónip turǵan tótenshe qaýip joq tárizdi.
«Jyl basynan beri 64,8 shaqyrym ýaqytsha bógetter jáne eldi mekenderdiń aınalasynda 52,7 shaqyrymnan asa qorǵandar salyndy. 721 shaqyrymǵa jýyq kanaldar men 2 296 shaqyrym aryqtar, avtomobıl jáne temir jol astyndaǵy 15 myńnan asa sý ótkizý qurylystary tazartyldy. 384 myń tonnadan asa ınertti materıaldar jáne 1,2 mln-nan asa qapshyq daıyndaldy. Sý tasqyny múmkin bolǵan jaǵdaıda halyqty qabyldaıtyn 3 031 pýnkt jáne aýyl sharýashylyǵy janýarlaryn ornalastyrý ýchaskeleri daıyndaldy, marshrýttar naqtylandy, arnaıy kólikter anyqtaldy», deıdi Jomart Asqarov.
Sonymen qatar jıynda Astana qalasy, Batys Qazaqstan, Aqmola, Qostanaı, Almaty, Qaraǵandy, Pavlodar, Ulytaý, Shyǵys Qazaqstan jáne Túrkistan oblystary ákimdikteriniń sý tasqynyna daıyn emestigi týraly 356 eskertý berilgeni aıtyldy. Sondaı-aq sý tasqyny jaǵdaıyna gıdrotehnıkalyq qurylystardyń jaǵdaıy áser etýi múmkin deıdi mamandar. Sý resýrstary jáne ırrıgasııa mınıstrliginiń sońǵy júrgizilgen zertteýleriniń nátıjeleri boıynsha qolda bar 1 502 tireýish gıdrotehnıkalyq qurylystardyń, 537-si jóndeýdi talap etetini aıtyldy.
«Bul rette 322 gıdrotehnıkalyq qurylystar yqtımal apattyq rejimi kezinde halyqqa qaýip tóndiredi, onyń 105-i jóndeý júrgizýdi talap etedi. Yqtımal sý basý aımaǵynda 481 eldi meken bar, onda 1,5 mıllıonnan asa adam turady», deıdi Tótenshe jaǵdaılar mınıstrliginiń ókili.
Jıynda suraq qoıýdyń reti kelgende máseleniń mánisin sál áriden qozǵaýǵa tyrystyq. Máselen, Japonııa, Qytaı sekildi elder kez kelgen máseleniń uzaqmerzimdi jaǵyn zertteıtini belgili. Al bizdiń basshylar máseleni tek sol kezde ǵana sheship, jedel nátıje kórsetýge tyrysatyny belgili. Árıne, úıińdi sý alyp bara jatsa, oılanyp tura almaıtynyń ras. Biraq oǵan deıin de onyń keshendi túrde zerttep, ol máseleni túbegeıli sheshýdiń joldaryn qarastyrýǵa bolar edi. Sol sebepti «Biz bul qar sýyn nege tıimdi paıdalana almaı otyrmyz? Keńes zamanynda mundaı qar sýynyń bári saı-salaǵa quıylyp, toǵanǵa jıylyp óndiriske, eginge paıdalanypty desedi. Bul qazir nege júzege aspaı qaldy? Maman joq pa, tehnıka tapshy ma?» degen saýal qoıdyq.
Buǵan jaýap bergen quzyrly oryn qyzmetkerleri túk te qynjylǵan joq. Kerisinshe, suraǵyma aıyzy qanǵandaı shyraıy kirgeni ras. Olardyń aıtýynsha, bul másele qolǵa alyna bastaǵan. Qazirdiń ózinde 20 shaqty qar sýyn jınaıtyn toǵandar salynyp, taǵy 15 apatty jaǵdaıǵa arnalǵan sý jınaıtyn oryn jasaqtalyp jatyr.