Prezıdent Qasym-Jomart Toqaev Qazaqstandy álemge tanytý úshin Altyn Orda brendin jan-jaqty jáne keńinen paıdalanýdy usyndy, dep jazady Egemen.kz.
Prezıdenttiń aıtýynsha, bolashaqqa senimmen qadam basý úshin tól tarıhymyzdyń aýqymy keń ekenin tolyq sezinip, mádenı muramyzdy saqtap, ony dáripteýimiz qajet.
«Qazaqstan – Uly daladaǵy kóshpendiler órkenıetiniń tikeleı murageri. Jer júzine Altyn Orda degen atpen tanylǵan áıgili Joshy Ulysy Ortalyq Eýrazııanyń baıtaq dalasyndaǵy eń qýatty memleket retinde moıyndalǵan. Osy ortaǵasyrlyq derjavanyń geosaıası murasy birqatar Eýrazııa memleketiniń, sonyń ishinde Qazaq handyǵynyń qurylýyna negiz boldy. Ulyq Ulystyń jerinde san alýan etnos jáne din ókilderi bir shańyraqtyń astynda ómir súrdi. Túrli mádenıetter ózara astasyp, memleket qurý isiniń biregeı úlgisi qalyptasty», dedi Memleket basshysy Ulttyq quryltaıdyń úshinshi otyrysynda.
Osy tusta Qasym-Jomart Toqaev Joshy áýleti 6 ǵasyr boıy Ortalyq Eýrazııanyń taǵdyryna tikeleı yqpal etkenin aıtyp, ulan-ǵaıyr aýmaqta birtutas órkenıet qurýǵa umtylǵanyn tilge tıek etti.
«Joshy ulysy Uly dalany meken etken halyqtardyń san ǵasyrlyq damý baǵdaryn aıqyndap otyrdy. Ulyq ulys memleketti basqarý isin jańa deńgeıge kóterdi. Onyń Rım ımperııasymen uqsastyǵy da – osynda. Bıyl Joshy ulysynyń negizi qalanǵanyna 800 jyl toldy. Búgingi jıynymyz da osy mereıli beleske tuspa-tus kelip otyr. Munyń zor sımvoldyq máni bar. Biz asta-tók toı jasaýǵa emes, salmaqty zertteý júrgizýge basa mán berýimiz kerek. Joshy ulysy Qazaqstannyń memlekettilik dástúrinde aıryqsha oryn alady. Elimizdiń ótkeni, búgini men bolashaǵy onyń tarıhı murasymen tyǵyz astasyp jatyr. Endeshe, Altyn Orda týraly halyqaralyq arenadaǵy túsinik Qazaqstanmen tikeleı baılanysty bolýy kerek», dedi Qasym-Jomart Kemeluly.
Sondaı-aq Prezıdent jaqynda Altyn Ordanyń tarıhy jáne áıgili tulǵalary týraly kóp serııaly derekti fılm túsirý jumystary bastalǵanyn habarlady. Oǵan sheteldiń tanymal mamandary tartylyp jatyr. Fılm belgili halyqaralyq platformalar arqyly kórsetilýi kerek. Memleket basshysynyń paıymynsha, elimizdi álemge tanytý úshin Altyn Orda brendin jan-jaqty jáne keńinen paıdalaný qajet. Ony tolyq zertteý úshin tabandy jumys isteý kerek. Ol úshin Prezıdent bastamasymen Joshy Ulysyn zertteıtin ǵylymı ınstıtýt qurylǵan edi.
«Qazir Qazaqstannyń jeti tomdyq jańa akademııalyq tarıhyn jazý úshin naqty jumys jasalyp jatyr. Oǵan 250-den astam ǵalym, sonyń ishinde 60 sheteldik maman jumyldyryldy. Akademııalyq basylymnyń osyndaı úlgisin ázirleý tájirıbesinde alǵash ret Joshy ulysyna jeke tom arnalmaq. Ony daıyndaýǵa Reseıdiń kórnekti tarıhshysy Vadım Trepavlov ta atsalysty. О́kinishke qaraı, ol jaqynda ómirden ozdy. Biraq Vadım Trepavlov óte qundy zertteý materıaldaryn ázirlep, ony kóptomdyqtyń redaksııalyq alqasyna tabystap ketti. Bul – Qazaqstan men Reseıdiń tarıhı mektepteri arasyndaǵy tıimdi yqpaldastyqtyń jarqyn kórinisi», dep túsindirdi Qasym-Jomart Toqaev.