Elordada ıgi ister marafony jalǵasyn tapty. «Astana jastary» jastar resýrstyq ortalyǵynyń eriktileri qaıyrymdylyq aksııasyn ótkizdi. Qoǵam janashyrlary kommýnaldyq qyzmetkerlerge baýyrsaq pen ystyq shaı úlestirdi. Buǵan qosa Ramazan aıy men Naýryz merekesine oraı kómekke muqtaj turǵyndarǵa azyq-túlik sebetin taratty.
Qazir elimizdiń túkpir-túkpirinde Naýryznamanyń onkúndigi ótip jatyr. Qaıyrymdylyq, janashyrlyqqa úndeıtin «Meıirimdilik kúni» astanalyq jastarymyz da kóppen birge boldy.
– Biz jyl boıyna osyndaı formattaǵy aksııalardy jıi ótkizemiz. Qarttarǵa, áleýmettik osylar toptaryna járdem berip, únemi nazardan tys qaldyrmaımyz. Bas qalanyń tynys-tirshiligine jaýapty kóshe qyzmetkerlerine qysta ystyq shaı men táttilerdi úlestirýge jıi shyǵamyz. Osylaısha, biz adamdardy meıirimdilikke, janashyrlyqqa jáne jaqsy qarym-qatynasqa úndegimiz keledi, – dedi volonter Arýjan Dáýletııarova.
О́z kezeginde, «Astana jastary» eriktiler qozǵalysyn damytý bóliminiń basshysy Elvıra Esmuhanova mundaı aksııalardy ótkizýdiń jáne qaıyrymdylyq kúnin atap ótýdiń mańyzdylyǵyna toqtaldy.
– Búginde «Astana jastary» jastar resýrstyq ortalyǵynyń qatarynda 5 myńnan astam volonter bar. Eriktilermen birge tipti az múmkindikpen de bir-birimizge kómektesýge bolatynyn kórsetkimiz keldi. Jastar kommýnaldyq qyzmetkerlerge arnap aksııa ótkizý bastamasyn kóterdi. Olar aýa raıynyń qolaısyzdyǵyna qaramastan qalada tártip pen tazalyqty saqtaıdy. Sondyqtan janashyrlar ystyq shaı men baýyrsaqtardy taratýmen qatar, qar kúreýge kómek kórsetedi, halyqtyń áleýmettik osal toptarynan shyqqan otbasylarǵa azyq-túlik sebetterin de tasymaldaıdy, – dedi E.Esmuhanova.
Qaıyrymdy jandardyń ıgi isine tánti bolǵan tazalyqshylar da jastarǵa alǵysyn aıtyp, úlkenderi aq batasyn berdi. Belsendiler «Igi ister marafony» aıasynda da elorda ákimdigi jáne «Qazaq oil» kompanııasymen birlese turǵyndarǵa 1000-nan asa azyq-túlik sebetin taratty.
– 2023 jyldyń naýryz-jeltoqsan aılary aralyǵynda Astanada muqtaj azamattarǵa 4 myńnan astam azyq-túlik jıyntyǵy taratyldy. Bul joly azyq-túlik jıyntyǵy az qamtylǵan otbasylar, kópbalaly analar, erekshe qajettilikteri bar balalardy tárbıelep otyrǵan otbasylar, zeınetkerler jáne tolyq emes otbasylar sııaqty halyqtyń áleýmettik osal toptaryna taratylady. Qoraptyń salmaǵy 45 kılo jáne barlyq júktiń salmaǵy 45 tonnadan asady. Azyq-túlik qorjynynda un, qant, qaraqumyq, kúrish, makaron, balalarǵa arnalǵan táttiler sııaqty qajetti taýarlar bar, – dedi Astana ákiminiń keńesshisi Qýanysh Moldabek.
Azyq-túlik sebetteriniń birin alǵan kópbalaly ana Roza Syrbekova aksııa uıymdastyrýshylaryna kórsetken kómegi úshin alǵysyn bildirdi.
– Qoldaý kórsetkenińiz úshin jáne merekelik kóńil-kúı syılaǵanyńyz úshin rahmet. Otandastarymdy Ulystyń uly kúni Naýryz merekesimen quttyqtaımyn. Barshańyzǵa densaýlyq pen ashyq aspan tileımin, – dedi elorda turǵyny.
«Igi ister marafony» qaıyrymdylyq aksııasy jyl sońyna deıin jalǵasady. Jalpy, Astanada azyq-túlik sebetteri jyl saıyn taratylady.