«Hat jazdym qalam alyp sizge erkem...» Bilmeımin, Dımashtyń osy «Daıdıdaýyn» tyńdaǵan saıyn birtúrli oılanyp qalamyn. Sezimin hat arqyly jetkizgender bizge qaraǵanda «romantık» boldy ma deımin...
Áýeli hat alýshynyń qurmetti hám ǵızatty ekenin óziniń de, onyń da esine salady. Odan keıin ardaqty basynyń amandyǵyn biledi. Izgi iltıpatyn taǵy bir bildire ketip, endi aýyl-aımaq, bota-taılaǵynyń qalyn suraıdy. Sóıtip, máseleniń mánisine osyndaı uıań amandasýdan keıin bir-aq túsedi uıatty qyz-jigitter. Al osylaı biz de hat arqyly bolmasa da, chat arqyly ádiptep, ádemilep jaǵdaı bilissek ne kedergi? Joq, ýatsappen ýaǵdalasyp qysqa-nusqa sóılesetin bizge Ábdirahman men Shuǵa sekildi hat almasýǵa tózimiz jetpeıdi. Bálkim sezimimiz shyǵar?
Qaıdan jetsin! Kóp zamandastarymyz kórkemsózdi kóbik sóz dep uǵa ma, áıteýir kóńili tartpaıdy. «Sáti kelip turǵanda sánine qarap jatar jaǵdaıym joq» dep tótesinen týra tartady da, suraqty «bylsh» etkizedi. Ondaıǵa ábden qanyqqan ekrannyń arǵy jaǵyndaǵysy da sózin «gúrs» etkizedi. Asqar Súleımenovtiń aforızmin sál maıystyryp aıtqanda, saýaly tergeý tektige jaýaby temirtekti sóz bolady da.
Adamdardyń sózi jaıdaq, sóılemi soıdaq bolatyn taǵy bir sebebi kitaptyń betin túıe botalaǵandaı az ashady. Al qalamdy nesıege qol qoıǵanǵa ǵana alsa ne qyl deısiz? Olardyń hatynan góri aryzy kórkem shyǵady. Kúlesiz be, jylaısyz ba? Álgindegi Ábdirahman men Shuǵalardyń hatyn oqyp alyp, áleýmettik jelige kirip qalsań kir sabyndy ezip ishkendeı betiń qaıtyp qalady. Ádebıet degen adamnyń tilin, dilin tárbıeleıtin birden-bir qural ǵoı. О́leń sózge ógeıligi bar jarym til qoǵamnyń bet túgil bezeý uıalatyn sózderdi mańyratyp jatqany sondyqtan bolsa kerek.
Al qaıyr saý bolyńyz, qadirli oqyrman! Aıtaıyn degenim osy edi.