Senat Tóraǵasy Máýlen Áshimbaev AQSh Kongresiniń senatory Stıv Deınspen kezdesti. Taraptar ekijaqty parlamentaralyq yntymaqtastyqty odan ári nyǵaıtý máselelerin talqylady. Kezdesý barysynda Qazaqstan-AQSh qarym-qatynasyn damytýda joǵary deńgeıdegi memleketaralyq turaqty saıası dıalogtyń yqpaly zor ekeni aıtyldy, dep habarlaıdy Egemen.kz joǵarǵy Palatanyń baspasóz qyzmetine silteme jasap.
Byltyr qyrkúıek aıynda Qasym-Jomart Toqaev pen Djo Baıden Nıý-Iorktegi BUU Bas Assambleıasy alańynda ótken S5+1 sammıtinde kezdesken edi. Sondaı-aq ótken jyldyń aqpan aıynda AQSh-tyń Memlekettik hatshysy Entonı Blınken Qazaqstanǵa resmı saparmen kelgeni málim.
Kezdesýde kópjaqty jáne parlamentaralyq baılanysty damytý máselelerine de basa mán berildi.
«Eki eldiń Prezıdentteri ózara qarym-qatynasymyzdyń strategııalyq basymdyqtaryn belgilep, Qazaqstan-Amerıka baılanysyn ári qaraı damytý úshin mańyzdy qadamdar jasady. Qazirgi ýaqytta eki memleket arasynda qarqyndy saıası dıalog qalyptasqan. Saýda-ekonomıkalyq ózara is-qımyl da belsendi damyp keledi jáne aýqymdy sharttyq-quqyqtyq baza bar. Elderimizdiń lıderleri belgilep bergen tyǵyz yntymaqtastyq basqa salalarda, onyń ishinde zań shyǵarýshy organdar arasynda da joǵary deńgeıde qoldaý tabýǵa tıis», dedi Máýlen Áshimbaev.
Sonymen qatar taraptar Parlament depýtattarynyń saýda-ekonomıkalyq yntymaqtastyq baǵytyndaǵy birlesken jumysyn jáne basqa máselelerdi talqylady.
Senat Spıkeri Parlamenttiń Memleket basshysynyń bastamasymen qolǵa alynǵan reformalardy zańnamalyq turǵydan qamtamasyz etý baǵytyndaǵy jumysyna, sondaı-aq, álemdik jáne dástúrli dinder lıderleri Seziniń Tujyrymdamasynyń iske asyrylý barysyna da toqtalyp ótti.
О́z kezeginde Stıv Deıns Qazaqstanda júrgizilgen keshendi jańǵyrýlardy joǵary baǵalap, bizdiń elde demokratııany damytýǵa, jańa ekonomıkalyq úlgige kóshýge, rýhanı dıplomatııany órkendetýge arnalǵan sharalardyń tıimdiligine nazar aýdardy jáne ózara birlesken jumysty jandandyrýǵa beıil ekenin atap ótti.