Bıyl qańtar aıynan beri Aqtóbe oblysynda balalaryna alıment tólemeı júrgen 127 boryshker jumysqa ornalastyryldy. Olardyń basym kópshiligi – ákeler.
Áıelinen resmı túrde ajyrasqandar balasynyń qajettiligin qamtamasyz ete almaýyna ártúrli sebep aıtady. Kópshiliginiń turaqty tabysy joq, keıbiri basqa memleketke qonys aýdarǵan nemese birqatarynyń turǵylyqty mekenjaıyn anyqtaý múmkin emes. Arasynda iz-túzsiz ketkender de bar. Alıment tólemeýge qyryq túrli syltaý tapsa da, «Neke jáne otbasy týraly» kodeksine sáıkes ajyrasqan áke men sheshe balany 18 jasqa deıin tárbıelep, ómirlik baǵdar berýge mindetti. Ajyrasý olardan negizgi jaýapkershilikti alyp tastamaıdy, balalarynyń sanyna qaraı aı saıyn alıment tólep turýǵa tıis.
Qazirgi kezde Aqtóbe oblysy sot oryndaýshylarynyń qolynda alıment óndirip alý týraly 10 myńnan asa atqarýshylyq is bar. Ádilet mınıstrligi men Eńbek jáne halyqty áleýmettik qorǵaý mınıstrliginiń 2017 jyly bekitilgen jumyspen qamtý organdary men sot oryndaýshylarynyń ózara is-qımyly týraly birlesken buıryǵyna sáıkes, boryshkerlerge bos jumys oryndary usynylady. Ýákiletti organdarda ártúrli bos jumys oryndary týraly barlyq aqparat bar jáne boryshkerlerdiń kásibı biliktiligi men mamandyǵyna sáıkes jumys túrleri usynylady.
О́kinishke qaraı, kóp jaǵdaıda ajyrasýdyń basty sebepteri – er adamdardyń maskúnemdigi men esirtkige táýeldiligi, qaryzǵa batýy. Áıelder otbasyn saqtap qalý múmkin bolmaǵan kezde ǵana ajyrasady. Alıment tólemeı júrgen boryshkerlerdiń birsypyrasy – bankter men mıkroqarjy uıymdarynyń aldynda qaryzǵa batý, lýdomanııaǵa shaldyqqandar jáne qarjy pıramıdasyna kirip qaryzǵa belshesinen batqandar. Bir nazar aýdararlyq jaıt, nekesi buzylǵandar arasynda keıingi kezde oıynqumarlyqqa shaldyqqan áıelder sany kóbeıgen.
Aqtóbe oblysy