Qyzyljar turǵyny Kenjebek Tańatovqa aǵashtan túıin túıgen óner arǵy ata-babasynan daryǵan. Aǵashqa oıý-órnek sala otyryp, túrli buıym jasaý – súıip aınalysatyn jumysy.
Árıne, ony kásipke aınaldyryp, tamaq asyraımyn dep oılaǵan joq-ty, alaıda buıymdaryna qyzyǵýshylyq tanytyp, satyp alýshylar paıda bola bastaǵanda, bul isti tabysty bızneske aınaldyrýǵa bolatynyna kózi jetti.
Qazir Kenjebek arnaıy stanok satyp alyp, tutas óndiris keshenin quryp otyr. Sóıtip, 2020 jyly «Creativ kz» kásipornyn tirketedi. Aldymen óz úıinde tapsyrys qabyldap, ásemdelgen qaıyń taqtaıdan oıýmen jasalǵan aıaq-tabaqtar, asúıdiń jaraqtary, eskertkish taqtalar jasap júrdi. Odan ári usynysqa baılanysty tór shejiresin ásemdep jasap beretin boldy. Osy buıym jerlesterdiń qyzyǵýshylyǵyn tipti arttyra tústi. Tapsyrys berýshi klıentter kezekke aldyn ala jazylatyn boldy.
Bıznesin damytýdy oılaǵan Kenjebek «Bıznes bastaý» baǵdarlamasy boıynsha usynylǵan 48 jobanyń biri bolyp konkýrsqa qatysyp, 500 myń teńgeniń qaıtarymsyz grantyn jeńip alǵan. 2021 jyly seh ashyp, isin odan ári dóńgeletti. Shıkizattyq materıaldardy Kenjebek negizinen Astana men Almatydan alatyn kórinedi.
«Aǵashtan istelgen buıymdardyń kóptegen artyqshylyǵy bar. Aldymen olar ekologııalyq turǵydan taza. Quramynda eshqandaı zııandy toksınder joq. Úı-ishindegi bala-shaǵa da, úlkender de esh qaýiptenbeı ustaı beredi. Ekinshiden, shıkizat kózi jaqyn bolǵandyqtan jasaǵan buıymdarymnyń baǵasy joǵary emes, ol barlyq turǵynǵa qoljetimdi. Úshinshiden, men tapsyrys berýshiniń barlyq qalaýyn aǵashtan jasaı beremin. Keıbireýler toı úshin arnaıy tapsyrys beredi. Jalpy, baǵaly aǵashtan jasalǵan zattar kez kelgen ıntererge sán beredi», deıdi Kenjebek Tańatov.
2022 jyly Kenjebek «Kásipkerlikti damytýdyń 2021-2025 jyldarda arnalǵan ulttyq jobasy» Memlekettik baǵdarlamasy boıynsha «Bank SentrKredıt» AQ arqyly 5 mln teńge nesıe aldy. Onyń jyldyq ósimi 23 paıyz bolǵanymen «Damý» qorynyń sýbsıdııalaýymen ósimniń 6 paıyzyn ǵana tóleıdi. Sonymen qatar nesıe boıynsha eshqandaı kepildik zat talap etilmeıdi. Osy nesıeniń arqasynda qazir Kenjebek aǵash súrgileıtin, oıýlaıtyn lazerlik baǵdarlamalyq stanok, 3D prınter satyp alyp, IT tehnologııalary arqyly taqtaıǵa sýret salýdy jasaıtyn bolǵan. Qazir bizdiń oblys qana emes, oǵan tapsyrys berýshiler kórshiles óńirlerden de keletin boldy.
Toı sánin keltirip, taqtaıǵa oıýlap jazylǵan ádemi tilekter, fotolarǵa arnalǵan órnekti jaqtaýlar, toıbastar tabaqtary, astaýlar, dekoratıvtik qoraptar kózdiń jaýyn alady.
Aǵashtan túıin túıgen sheberdiń sehynda qazir 5 adam nápaqasyn aıyryp otyr.
Soltústik Qazaqstan oblysy