Premer-mınıstr Oljas Bektenovtiń tóraǵalyǵymen ınvestısııalyq ahýaldy jaqsartý jónindegi keńestiń otyrysy ótti, onda salyq zańnamasyn jetildirý, básekelestikti damytý jáne sybaılas jemqorlyqqa qarsy kúres jónindegi halyqaralyq standarttardy engizý máseleleri talqylandy.
Qazaqstan Úkimeti eldiń ınvestısııalyq tartymdylyǵyn odan ári jaqsartý úshin júıeli jumys júrgizip keledi. Qazirgi ýaqytta jańa Salyq kodeksi ázirlenýde, onyń aıasynda ákimshilendirýdiń servıstik modeli engiziledi. Osylaısha, salyq tóleýshige tirkeýden bastap, ony esepten shyǵarýǵa deıin fıskaldyq kómek kórsetiledi. Nátıjesinde, eldegi salyq eseptiligi 30%-ǵa, salyq boıynsha tólemder sany 20%-ǵa qysqarady dep kútilip otyr. Bul rette bıznes úshin yntalandyratyn tıimdi jeńildikter saqtalady.
Qazaqstanda básekelestikti qorǵaý men damytýdyń 2026 jylǵa deıingi tujyrymdamasy iske asyrylýda, qujatqa sáıkes memlekettiń ekonomıkadaǵy úlesin 2025 jylǵa qaraı 14%-ǵa deıin tómendetý kózdelgen.
Sonymen qatar sybaılas jemqorlyq táýekelderimen kúres boıynsha belsendi jumys júrgizilip keledi. Qazaqstan sybaılas jemqorlyqqa jáne kiristerdiń izin jasyrýǵa qarsy is-qımyl salasyndaǵy negizgi halyqaralyq konvensııalarǵa – Sybaılas jemqorlyqqa qarsy kúres jónindegi Ystanbul is-qımyl josparyna qosylyp, sybaılas jemqorlyqqa qarsy elder tobyna kirdi. Jalpy halyqaralyq uıymdarmen jáne sheteldik sybaılas jemqorlyqqa qarsy organdarmen ózara úılesimdi is-qımyl jolǵa qoıylǵan.
Beınekonferensbaılanys júıesi boıynsha otyrys barysynda Qazaqstandaǵy Amerıkalyq saýda palatasynyń atqarýshy dırektory Dorıs Bredberı, Kanadanyń QR-daǵy Tótenshe jáne ókiletti elshisi Alan Hamson, Eýropalyq Odaqtyń elshisi Kestýtıs Iаnkaýskas, EYDU Sybaılas jemqorlyqqa qarsy jelisiniń dırektory Olga Savran, sondaı-aq sheteldik ınvestor-kompanııalardyń jáne memlekettik organdardyń basshylary sóz sóıledi.
Otyrysty qorytyndylaı kele, Úkimet basshysy barlyq aıtylǵan usynysty zerdeleýdi tapsyrdy. Qolaıly ınvestısııalyq klımat Qazaqstanda ekonomıkany sapaly jańǵyrtý boıynsha reformalardy júrgizýde mańyzdy ról atqarady. Adal básekelestikti kúsheıtý, jekemenshikti qorǵaý jáne demonopolızasııalaý máseleleri – erekshe baqylaýda.
«Memleket basshysy árdaıym eldiń ınvestısııalyq ahýalyn jaqsartý qajettigine erekshe nazar aýdarady. Úkimet elimizge adal jáne ashyq bıznes júrgizýge kelgenderdiń barlyǵyna senimdi ınvestısııalyq seriktes bolýǵa daıyn. Biz óndiristi keńeıtýge, lokalızasııany ulǵaıtýǵa, elimiz úshin mańyzdy jańa jobalardy iske asyrýǵa qoldaý kórsetýge nıettimiz», dedi O.Bektenov.