Sý tasqyny bastalǵannan beri el óńirlerinde armııa bólimsheleri jergilikti turǵyndardy qutqarýǵa, TJM jáne jergilikti atqarýshy bıliktiń qutqarý qyzmetterine kómek kórsetip jatyr, dep habarlaıdy Egemen.kz Qorǵanys mınıstrliginiń málimetine silteme jasap.
Áýe qorǵanysy kúshteri men ushqyshtar daıarlaıtyn áskerı joǵary oqý ornynyń ekıpajdary jappaı sý basqan Aqtóbe óńiriniń eldi mekenderi men qystaqtarynan aýyl turǵyndaryn evakýasııalaýdy jalǵastyryp jatyr.
Qaraǵandy oblysyna qarasty Nura aýdanynyń Nura, Myńbaev, Egindi aýyldarynda sý tasqynyna qarsy sharalarǵa «Astana» óńirlik qolbasshylyǵy 31775, 44803, 55524 áskerı bólimderiniń 144 áskerı qyzmetshisi qosyldy. 8 birlik arnaıy avtokólik tehnıkasy bólindi. Jeke quram Suryptaý stansııasy mańyndaǵy sý qoımasynyń jáne Nura ózeniniń boıynda ornalasqan aýyldardyń aınalasyna qum salynǵan qapshyqtardy tósep, úıindi jasap jatyr.
Aqmola oblysynyń Aqkól qalasynda 55209 áskerı bóliminiń áskerı qyzmetshileri 1000 metrge jýyq aǵyn sý kárizin tazartty.
27 naýryzdan 1 sáýirge deıin áskerı ushqyshtar barlyǵy 1851 adamdy evakýasııalady, onyń 557-si bala, 30 tonnadan astam gýmanıtarlyq júk jetkizildi.
Odan ózge 17 myńǵa jýyq qapshyq daıyndalyp, tóseldi. 200 tonna qum jetkizý úshin mashınalar 97 reıs jasady. 1400 metrge jýyq aǵyn sý kárizi tazartyldy.
Sý tasqynyna qarsy sharalar áli jalǵasyp jatyr. Qarýly kúshterdiń kúsh-quraldary jergilikti halyqqa kómek kórsetý jónindegi mindetterdi oryndaýǵa qashanda daıyn ekeni málim boldy.