Ulttyq ulan avıasııasynyń MI-171E tikushaǵynyń ekıpajy Aqtóbe oblysynda sý tasqynynan zardap shekken adamdardy evakýasııalaýǵa jáne tasymaldaýǵa atsalysyp júr.
Áýe kemesiniń komandıri, podpolkovnık Qanat Ahmetov, tikushaq eskadrılıasy komandıriniń ınjenerlik-avıasııalyq qyzmet jónindegi orynbasary, podpolkovnık Ashat Jýkın, shtýrman, aǵa leıtenant Nurbolat Sovetbekov sý basqan aýdandardan turǵyndardy qutqarý úshin áýege kóterildi.
– Qazirgi ýaqytqa deıin Shyǵanaq Bersıev atyndaǵy aýyldyq okrýg pen Qarataý aýylynan 142 adam evakýasııalandy, olardyń ishinde 85 bala bar. Olar Aqtóbe oblysyna qarasty Oıyl aýdanynyń Oıyl aýylyna kóshirildi. Qaýipsiz jerge jetkizilgenderdiń basym bóligi qarııalar, balalar men áıelder. Sondaı-aq Ulttyq ulannyń áskerı borttarynyń ekıpajdary Aqtóbe men Oralda da belsendi jumysyn jalǵastyryp júr. Ol jaqtarda áýe kóligimen nan, sý, makaron, kartop, konserviler jóneltildi, – dedi podpolkovnık Qanat Ahmetov.
Keıbir eldi mekenderdegi sý bir metrge deıingi bıiktikke nemese odan da joǵary deńgeıge kóterilgen. Sondyqtan ulandyqtar TJM jeke quramymen birlesip sý qoımalary men ózenderdiń tolymdylyǵyna monıtorıng júrgizedi. Qazirgi ýaqytta Aqtóbe, Sazdy, Ashysaı jáne Jartas sý qoımalary tranzıttik rejimde jumys istep tur. Sýdy belsendi aǵyzý júzege asyrylyp jatyr. Jınaqtaý rejiminde Qarǵaly sý qoımasy ornalasqan. Ákimdikter sý tasqyny jaǵdaıynyń shıelenisý qaýpi bar óńirlerde aldyn alý is-sharalaryn júrgizýge kirisken. Qajet bolǵan jaǵdaıda qosymsha kúshter men quraldar tartylady.
О́tken táýlikte, táýliktiń túngi ýaqytyn qosa alǵanda, qutqarýshylar, eriktiler jáne Ulttyq ulan áskerı qyzmetshileriniń birlesken kúsh-jigerimen asa qaýipti jáne qaýip tónýi múmkin ýchaskelerde 250 tonna ınertti materıal jınalyp, sý jaǵasyna qum toly 600 qap tóselgen. Sonymen qatar 800 tekshe metr sý shyǵarylǵan.