Astanada «Otan-Ana» Otan qorǵaýshylar alańynda 1995 jyly tájik-aýǵan shekarasynda qaza tapqan 17 quqyq qorǵaý áskeri jaýyngerleriniń obelıskine gúl shoqtaryn qoıý rásimi ótti. Is-sharaǵa Ulttyq ulan men Shekara qyzmetiniń qolbasshylyǵy, áskerler men jergilikti qaqtyǵystardyń ardagerleri, Astana garnızonynyń áskerı qyzmetshileri jáne elordalyq №25 mekteptiń «Jas búrkit» kadet synyptarynyń oqýshylary qatysty. Bul týraly QR Ulttyq ulanynyń baspasóz qyzmeti habarlady.
Qazaqstan Respýblıkasy Joǵarǵy Keńesiniń Qaýlysyna sáıkes 1993-1999 jyldary Ishki áskerlerdiń jedel maqsattaǵy bólimderinen eki myńnan astam sarbazdar men ofıserler Qazaqstan Respýblıkasynyń jekelegen jıyntyq batalony quramynda tájik-aýǵan shekarasynda jaýyngerlik mindetterdi oryndady.
Ishki áskerler tarıhyndaǵy qaıǵyly oqıǵa 1995 jyly 7 sáýirde boldy. 29 jyl buryn, Tájikstan Respýblıkasynyń Pshıhavr taý shatqalynda Shymkent polkiniń jıyntyq rotasy shekaraǵa irgeles jaqtan sodyrlardyń kenetten qarýly shabýylyna ushyrady. Jaýdyń joǵary kúshterimen tórt saǵattyq teń emes shaıqas kezinde bizdiń jaýyngerler toıtarys berip, olardy sheginýge májbúr etti. Bul qandy shaıqasta 17 jaýynger qaza taýyp, 33 adam jaraqat aldy. Biraq sarbazdar ózderiniń qyzmettik boryshyn abyroımen oryndap, «Qazbattyń» ar-namysy men qadir-qasıetin joǵaltpaı, áskerı antqa adaldyq tanytty.
«Búgin biz jyl saıynǵy dástúr boıynsha Ishki áskerlerdiń jaýyngerlerin eske alamyz, olardyń batyldyǵy men tabandylyǵyna bas ıemiz. Olar baýyrlas Tájikstandaǵy bitimgershilik mıssııasyn oryndady. Olardyń áskerı boryshyna adaldyǵy, týǵan eline degen súıispenshiligin aıta otyryp, óz Otanynyń laıyqty uldaryn tárbıelegen ata-analaryna alǵysymyzdy bildiremiz. Qazaqstan Respýblıkasy Prezıdentiniń 1996 jylǵy 20 qarashadaǵy Jarlyǵymen TMD-nyń syrtqy shekaralaryn kúzetý jónindegi áskerı boryshyn oryndaý kezinde kórsetken erligi men janqııarlyǵy úshin qaıtys bolǵannan keıin II dárejeli «Aıbyn» ordenimen 5 adam jáne 12 adam «Jaýyngerlik erligi úshin» medalimen marapattaldy, dep atap ótti QR Ishki ister mınıstriniń orynbasary - Ulttyq ulannyń Bas qolbasshysy general-leıtenant Erkin Botaqanov.
Bas qolbasshynyń baıandamasynda sarbazdardyń erligi beınelengen 2019 jyly «Qazbat» kórkem fılmi jáne qaza tapqan jaýyngerlerdiń batyldyǵy men tabandylyǵy týraly baıandaıtyn serıal da tilge tıek etildi.
«Búgin biz 90-shy jyldary áskerı boryshyn ótegen jaýyngerlik dostarymyzǵa qurmet kórsetemiz. Bastapqyda Qazaqstannan Qorǵanys mınıstrliginiń eki rotasynan, Shekara áskerleriniń eki rotasynan jáne Ishki áskerlerdiń bir rotasynan turatyn jıyntyq batalon quryldy. Quqyqtyq tártip áskerleriniń rotasy Ońtústik Qazaqstan oblysynda «Aqtas» polıgonynda daıyndyqtan ótti. Eger sol qaıǵyly kún týraly tikeleı aıtatyn bolsaq – sol kúni bizdiń balalar bir ýchaskeden ekinshi ýchaskege kóshirildi, sherý kezinde olarǵa shabýyl jasalǵan kezde olardyń týǵan aýyldaryndaǵy mektepter men kósheler qaza tapqan batyrlardyń atymen ataldy, Ulttyq ulannyń árbir áskerı bóliminde qaza tapqan 17 jaýyngerge arnalǵan eskertkishter men obelıskter bar, dedi óz sózinde Ishki áskerlerdiń qolbasshysy mindetin atqarǵan general-leıtenant Bolat Janasaev.
Sondaı-aq, QR Ulttyq ulany ardagerler keńesiniń tóraǵasy general-maıor Qalıaqpar Toqyshev, «Zastava Tarlandary» shekara ardagerleri respýblıkalyq qoǵamdyq birlestiginiń tóraǵasy general-maıor Muhtar Sabıdoldanov jáne «Aıbyn» ordeniniń ıegeri, zapastaǵy aǵa leıtenant Qaırat Sátbaev sol aýyr jyldar týraly jáne atalǵan oqıǵa týraly estelikterin aıtty.
Aıta keteıik, bul kúnderi Ulttyq ulannyń áskerı bólimderi ornalasqan elimizdiń barlyq óńirlerinde – qaza tapqandardyń jeke quramy, ardagerleri, áriptesteri, olardyń dostary men joldastary ózderiniń áskerı boryshyn sońyna deıin oryndaǵandarǵa qurmet kórsetý úshin obelıskterdiń, eskertkishterdiń janyna jınalady.