Túrkistanda Sıdneı Olımpıadasynyń jeńimpazy, «Barys» ordeniniń alǵashqy ıegeri Bekzat Sattarhanovty eske alýǵa arnalǵan bokstan jastar arasyndaǵy XXII halyqaralyq týrnır jeńimpazdary anyqtaldy. Dástúrli týrnırde elimizdiń óńirlerinen, Qyrǵyzstan, О́zbekstan, Tájikstan elderinen kelgen 220-ǵa jýyq sportshy 13 salmaq dárejesinde synǵa túsip, jeńimpazdar men júldegerlerdi anyqtady.
Bekzattaı chempıon bolýdy armandaǵan jastardyń Túrkistanǵa sapar aldynda Sıdneı Olımpıadasyndaǵy fınaldyq jekpe-jek týraly aqparattardy qaıta bir aqtaryp, beınetúsirilimderdi taǵy bir tamashalap, qanattanyp kelgeni anyq. Jas boksshylardyń otty janaryn kórgen biz solaı oıladyq. Iá, sol synda Olımp shyńynyń ushar basynda, ıaǵnı aqtyq synda kezdesken qos myqtynyń biri – 1999 jylǵy álem chempıony, amerıkalyq Rıkardo Hýares, ekinshisi buǵan deıin jalpaq dúnıege aty beımálim Bekzat Sattarhanov edi. Ekeýi – túıdeı qurdas. Ekinshi raýnd bitkende Sattarhanov oq boıy ozyq turdy, esep – 15:4. Úshinshi, tórtinshi raýndtardaǵy jan alyp, jan berisken jekpe-jek, jalpy sol kezdesý búgingi jas sportshylar sabaq alatyn sheberliktiń, namys pen tabandylyqtyń, jeńiske degen umtylystyń jıyntyǵy syndy edi. Al «Olympic Center» sport kesheninde ótken jarystyń ashylý saltanatynda Túrkistan qalasynyń ákimi Nurbol Turashbekov, Bekzattyń anasy Syrlykúl Sattarhanova quttyqtaý sóz sóılep, sportshylarǵa sáttilik tiledi.
«Eldiń atyn shyǵarǵan erdiń esimi jańǵyryp, jyl saıyn týrnır ótip jatqanyna ana júregimmen qýanyshtymyn. Shyn myqtyǵa tusaý joq. Kúlli qazaqtyń dańqyn 20 jasynda álemge tanytqan Bekzattyń sporttaǵy dańǵyl joly boksshylarymyzǵa juǵysty bolsyn. Jarysty halyqaralyq deńgeıde uıymdastyrýdy dástúrge aınaldyrǵan oblys ákimdigine, oblystyq deneshynyqtyrý jáne sport basqarmasyna, Ábdisalan Nurmahanov atyndaǵy sport mektebiniń ujymyna alǵysym sheksiz», dedi Syrlykúl Adyrbekqyzy.
Sondaı-aq Olımpıada chempıony Ermahan Ibraımov bastaǵan er Bekzattyń sport salasyndaǵy áriptesteri men elimizdegi boks maıtalmandary jas bylǵary qolǵap sheberlerine sáttilik tiledi.
Tartysty ótken týrnır Bekzattyń kindigi kesilgen kúni, ıaǵnı 4 sáýirde óz máresine jetti. Boks dodasynyń qorytyndysynda qyzdar arasynda baq synaǵan almatylyq E.Turǵanova (50 kg), túrkistandyq L.Abdýllaeva (54 kg), Qyrǵyzstannan kelgen M.Ádilbaeva (57 kg), Almaty oblysynan M.Manatqyzy (60 kg), A.Esbosynova (Mańǵystaý oblysy. 66 kg) jáne 75 kıloda túrkistandyq Sh.Nálibaı barlyq qarsylasyn tize búktirip, jeńimpaz atandy.
Al uldar arasynda sharshy alańda jasyndaı jarqyldaǵan ulandarymyz joǵary dárejede óner kórsetti. Naqtyraq aıtsaq, B.Nurymbetov (Shymkent q. 48 kg), D.Berikbaı (Jetisý obl. 51 kg), B.Askertaev (Aqmola obl. 54 kg), E.Uzaqbaı (Túrkistan obl. 57), Ǵ.Ermekbaı (Jambyl obl. 60 kg), A.Úsen (Túrkistan obl. 63,5), A.Kósherbaı (Jambyl obl. 67kg), B.Nurmahan (Mańǵystaý obl. 71 kg), A.Keńshilik (Aqtóbe obl. 75 kg), R.Dıneýov (Aqtóbe obl. 80 kg), I.Dnıshev (BQO. 86 kg), D.Danııar (Almaty obl. 92 kg), S.Tlekbaı (Mańǵystaý obl. +92 kg) altynnan alqa taqty. Jarys jeńimpazdary men júldegerlerine belbeý, medal jáne dıplom tabystaldy.
Aıta ketelik, Túrkistanda Bekzat Sattarhanov atyndaǵy sport kesheni salynyp jatyr. Búginde nysannyń ishki árleý, qasbetti sándeý, jylytý, jeldetý júıelerin ornatý jumystary júrgizilýde. Ǵımarattyń jalpy aýdany – 7 248 sharshy metr, jer aýmaǵy – 1,8 gektar, quny – 3,1 mlrd teńge. Nysan bıyl tapsyrylady. Zamanaýı sport kesheninde Á.Nurmahanov atyndaǵy sport mektebiniń ujymy ornalasady. Keshende respýblıkalyq, halyqaralyq jarystardy ótkizýge múmkindik jasalady. Jalpy oblys kóleminde 39 sport mekemesinde 6 200-den asa sportshy bokspen shuǵyldansa, olardy 270 jattyqtyrýshy baptap júr.
TÚRKISTAN