Bul týraly Qazaqstan Respýblıkasyndaǵy Bala quqyqtary jónindegi ýákil Dınara Zákıeva málimdedi, dep habarlaıdy Egemen.kz.
«Aıta ketý kerek, bizde 12 myń bala qolaısyz sanatta esepte turǵan otbasylarda turady. Bul rette balalar úıde ata-anasynyń qasynda, olardy eshkim quqyǵynan aıyrǵan joq. Olarmen profılaktıkalyq jumystar júrgiziledi, bul otbasylar únemi baqylanady», dedi Dınara Zákıeva.
Onyń aıtýynsha, bul balanyń óz otbasynda ómir súrý múmkindigin barynsha saqtaý úshin jasalyp jatyr.
«Memleketimizdiń maqsaty – otbasy ınstıtýtyn nyǵaıtý. Sondyqtan balany sebepsiz alyp ketý durys emes», dep qosty D.Zákıeva.
Sondaı-aq Dınara Zákıeva turmysy tómen nemese nashar otbasylardaǵy balalardy áketýdiń jańa zańnamalyq tetikterin engizý múmkindigine qatysty pikir bildirdi.
«Qazirgi qoldanystaǵy zańnamada, Otbasy kodeksinde balalardy áketýdiń, ata-ana quqyǵynan aıyrýdyń jáne shekteýdiń barlyq negizderi bekitilgen. Jańa sebepter joq», dedi ol.
Esterińizge sala keteıik, búgin «Qazaqstan Respýblıkasynyń keıbir zańnamalyq aktilerine áıelderdiń quqyqtaryn jáne balalardyń qaýipsizdigin qamtamasyz etý máseleleri boıynsha ózgerister men tolyqtyrýlar engizý týraly» zań jobasy eki oqylymda maquldandy.