Áıelderdiń quqyqtary men balalardyń qaýipsizdigin qamtamasyz etý týraly zań ata-ana quqyǵynan aıyrýdy kózdemeıdi. Qujat erejeleri áıelder men balalardyń qaýipsizdigin arttyrý maqsatynda ázirlendi. Bul týraly Máýlen Áshimbaev Palata otyrysy barysynda aıtty, dep habarlaıdy Egemen.kz Senattyń baspasóz qyzmetine silteme jasap.
Senat Tóraǵasy atap ótkendeı, bul zańdar Memleket basshysynyń tapsyrmalary aıasynda ázirlengen. Jańa normalar áıelder men balalarǵa qatysty qylmystardyń aldyn alýdy jáne jolyn kesýdi kózdeıdi. Senat Spıkeri áriptesterin zańdardyń negizgi maqsattaryn durys túsindirýge jáne engizilgen erejelerdiń mańyzyn jurtshylyqqa jetkizýge shaqyrdy.
«Qazirdiń ózinde qoldanystaǵy zańnamada, neke jáne otbasy týraly zańda ata-analar qandaı da bir qylmystyq quqyq buzýshylyq jasaǵan jaǵdaıda ata-ana quqyǵynan aıyrylatyn normalar bar. Alaıda, ol normalar jappaı ata-ana quqyǵynan aıyrýǵa ákelmegeni belgili. Tarıhymyzda ondaı jaǵdaı bolǵan joq. Sondyqtan Memleket basshysy zańǵa qol qoıyp, kúshine engen jaǵdaıda qujat jappaı ata-ana quqyǵynan aıyrýǵa ákeledi degenge senýdiń eshqandaı negizi joq. Bul meniń jeke pikirim. Bul qate jáne teris túsiný. Zańda mundaı normalar joq. Sol sebepti osy zań ata-analardy ata-ana quqyǵynan aıyrýǵa arnalmaǵanyn naqty ári anyq túsindirip, jetkizýimiz kerek. Ol áıelderdi qorǵaý jáne balalardyń qaýipsizdigin qamtamasyz etý úshin jumys isteıdi», dedi Máýlen Áshimbaev.
Eske salaıyq, búgin senatorlar Palata otyrysynda «QR-nyń keıbir zańnamalyq aktilerine áıelderdiń quqyqtary men balalardyń qaýipsizdigin qamtamasyz etý máseleleri boıynsha ózgerister men tolyqtyrýlar engizý týraly» zańdy jáne oǵan ilespe «QR-nyń Ákimshilik quqyq buzýshylyq týraly kodeksine áıelderdiń quqyqtary men balalardyń qaýipsizdigin qamtamasyz etý máseleleri boıynsha ózgerister men tolyqtyrýlar engizý týraly» zańdy eki oqylymda maquldady.