Birtýar ánshi, aqyn ári kompozıtor Segiz seriniń «Gaýhartas», «Nazqońyr», «Sáýlem-aı» atty ǵajaıyp ánderi men basqa da týyndylary «Astana opera» sahnasynda qaıta jandanyp, kórermenderdi mýzyka halyqtyń janyna aınalǵan dáýirge jeteleıdi.
20 sáýir kúni K.Baıseıitova atyndaǵy Kameralyq zalda ótetin vokaldyq mýzyka keshinde «Astana operanyń» jetekshi solısi, Qazaqstannyń eńbek sińirgen ártisi Jannat Baqtaı tereń úndestigi men san alýan sezimderimen tanymal osynaý ǵajaıyp álemdi qaıta jańǵyrtady.
– Ár aǵashqa tamyry qalaı mańyzdy bolsa, árbir adamǵa onyń shyqqan jeri men tegi, Otany men tarıhy, týǵan ánderi solaı mańyzdy. Dál osy halyq ánderi kompozıtorlarǵa opera men balet jaýharlaryn jasaý úshin shabyt kózi bolǵan. Bala kúnimnen qulaǵyma sińirip, estip ósken qazaq halyq ánderi – shyǵarmashylyǵymnyń altyn dińgegi. Bul – meni tarıhymmen, elimmen, mýzykalyq otbasymmen jáne ata-babammen baılanystyratyn arqaý. Aıtýly konsertte men túp-tamyrymyzǵa, onyń ishinde keń baıtaq Saryarqa dalasynyń perzenti, halqymyzdyń maqtanyshy, meniń arǵy atam, óz zamanynyń aıtýly azamaty, kadet korpýsyn bitirgen ofıser, óz eliniń patrıoty – kompozıtor Segiz seriniń shyǵarmashylyǵyna den qoıyp, ánderiniń qyr-syryna boılaıtyn bolamyn. Ol jaýynger retinde Mahambet О́temisulynyń azattyq qozǵalysyna qatysqan, «Qyz Jibek», «Qozy Kórpesh – Baıan sulý» jáne taǵy basqa poemalardyń alǵashqy nusqasynyń qoljazbasyn jasaǵan. Eń bastysy, áıgili «Gaýhartas», «Alqońyr», «Aqbaqaı» syndy aıtýly ánderdi shyǵardy, bul ánderdi jalpylama túrde jaı ǵana halyq ánderi dep ataý orynsyz. Keremet júrgizýshi, tarıh ǵylymdarynyń kandıdaty, professor Jumamurat Shámshi konsertte osy jáne basqa da jaıttar týraly áńgimeleı otyryp, Segiz seriniń ómirinen áserli de qyzyqty hıkaıalaryn baıan etedi, – dep Jannat Baqtaı shyǵarmashylyq keshiniń ereksheligi týraly aıtyp berdi.
Konsert óz eliniń mádenı kodyn tanýǵa jáne saqtaýǵa umtylǵan barlyq jandar úshin merekege aınalady dep basa aıtty ánshi. Segiz seriniń týyndylarynan bólek, baǵdarlamada halyq ánderi, sondaı-aq Qazaqstannyń zamanaýı kompozıtorlarynyń shyǵarmalary da qosa shyrqalady. Osylaısha, mýzykalyq dástúrler jalǵastyǵy qaıta jandanyp, án óneriniń kókjıegin keńite túspek.
– Meniń konsertim – proza, poezııa men mýzyka bir-birin birqalypty tolyqtyryp, úılesimdi shyrqalatyn mýzykalyq-ádebı kesh. Ulttyq ónerdi, halyq mýzykasyn nasıhattaý qaı ýaqytta da keler urpaq úshin ózekti. Mýzykany tyńdaý ǵana emes, sondaı-aq týyndynyń jazylý tarıhy, onyń avtorlary, qyzyqty derekter men bolǵan oqıǵalar týraly aıtý mańyzdy. О́ıtkeni óziniń dástúrlerin, ádet-ǵuryptaryn, tilin, dilin, tarıhyn biletin, ıaǵnı óziniń mádenıetin tanıtyn adam – shyn mánindegi zııaly adam. Al ózine ózi senimdi, júregi jomart, nıeti túzý ári adamgershiligi mol adamnyń túısigi men jan dúnıesi basqa mádenıetterdi qabyldaýǵa jáne qurmetteýge ashyq. Bul konserttegi maqsatym – tyńdarmandarǵa rýhanı lázzat syılaý ǵana emes, sonymen qatar konsertke aǵartýshylyq sıpat ústeý. Halyq ánderi men Segiz seri shyǵarmashylyǵy arasyndaǵy zamanaýı úılesimdilikti aıshyqtap kórsetý. Atalǵan keshte tyńdarman qaýym tamasha kompozıtor-mýltıaspapshy Ádiljan Tolyqpaevtyń ónerine tánti bolyp, «Astana operanyń» talantty solısteri Narul Toıkenov pen Rasýl Jarmaǵambetovtiń ǵajaıyp daýystaryn tyńdaı alady. Konsert kórermenderimizdiń kóńilinen shyǵady degen senimdemin, – dep ánshi sózin qorytyndylady.
Konsert uıymdastyrýshylarynyń aıtýynsha, qazaq halqynyń murasyna aınalǵan mýzykany jańǵyrtý – elordalyq teatrdyń negizgi maqsattarynyń biri. «Uly dala sazy» toptamasynan usynylyp otyrǵan «Gaýhartas» vokaldyq mýzyka keshi kórermenderge halyq óneriniń ásemdigi men ulylyǵyna boılaýǵa múmkindik beredi. Bul mádenı murany saqtaýdyń jáne ony keler urpaqqa jetkizýdiń mańyzdy qadamy ekendigi sózsiz.