Ǵylym jáne tehnologııalar jónindegi ulttyq keńestiń otyrysy barysynda Prezıdent Qasym-Jomart Toqaev ýnıversıtet ǵylymy men ǵylymı ınfraqurylymdy damytýǵa nazar aýdarý qajettigin aıtty, dep habarlaıdy Egemen.kz Aqordanyń baspasóz qyzmetine silteme jasap.
Prezıdenttiń aıtýynsha, sońǵy jyldary ǵylym jáne orta bilim salasynda tabysty reformalar jasaldy. Biraq tyń ózgerister joǵary oqý oryndarynan kadrlardyń ketýine ákep soqtyrdy. Ǵylymı ataǵy bar bilikti oqytýshylar jalaqysy kóp mektepterge jáne ǵylymı uıymdarǵa aýysa bastady.
«Búginde ýnıversıtet professorlary men oqytýshylary arasynda ǵylymı ataǵy bar mamandardyń úlesi 40 paıyzdan sál asady. Bul úrdis doktorant pen magıstrant qana emes, bakalavr daıarlaýdyń sapasyna da keri áser etedi. Quzyrly mınıstrlikke naqty shara qabyldaýdy tapsyramyn», dedi el Prezıdenti.
Jalpy ýnıversıtettegi kadr tapshylyǵy ǵylymı jumystardyń deńgeıine teris yqpal etip otyr. Joǵary oqý oryndaryndaǵy ǵalymdardyń eńbekterine silteme jasaý kórsetkishi óte tómen. Iаǵnı 100 baldyq júıeniń bir ballynan da aspaıdy.
«Ýnıversıtet ǵylymynda qordalanǵan máseleler az emes. Bedeldi halyqaralyq reıtıngterde kórsetkishterdiń tómen bolýy – sonyń bir kórinisi. Jaǵdaıdy túzeý úshin keshendi sharalardy dereý qolǵa alý kerek. Joǵary oqý oryndarynyń kemshin tusy – ǵylymı zertteýlerdiń sapasyz jasalýy. Sondaı-aq óndiris oryndarymen turaqty baılanys jolǵa qoıylmaǵan, al keıbir oqý oryndarynda múlde joq deýge bolady. Bilim ordalarynyń basym bóligi jumystyń tıimsiz ári eskirgen tásilderin qoldanyp keledi», ded Memleket basshysy.
Jalpy ýnıversıtetter men ǵylymı uıymdar eldiń áleýmettik-ekonomıkalyq damýyna zor úles qosatyn strategııalyq ortalyq bolýy kerek. Osyǵan baılanysty Prezıdent Úkimetke arnaıy baǵdarlama ázirleýdi tapsyrdy.