Qazaqstan Respýblıkasynyń Prezıdenti Qasym-Jomart Toqaev «Armenpress» aqparat agenttigine suhbat berdi, dep habarlaıdy Egemen.kz.
Memleket basshysyna «Qurmetti Qasym-Jomart Kemeluly, bıylǵy jyldyń qyrkúıek aıynda Armenııa men Qazaqstan arasyndaǵy dostyq jáne yntymaqtastyq týraly shartqa qol qoıylǵanyna 25 jyl tolady. Armıan-qazaq qarym-qatynastarynyń qazirgi damý dınamıkasyn qalaı sıpattaısyz?» degen suraq qoıyldy.
Prezıdenttiń aıtýynsha, bıylǵy jyl ekijaqty qatynastar úshin erekshe jáne sımvoldyq jyl bolyp esepteledi.
«1999 jyly Qazaqstan men Armenııa qabyldaǵan irgeli memleketaralyq qujat – dostyq pen yntymaqtastyq týraly shart – qazaq-armıan kóp qyrly qarym-qatynastarynyń senimdi irgetasyn qalady. Osy jyldar ishinde biz onyń erejelerin qatań ustandyq, elderimiz ben halyqtarymyz arasyndaǵy baılanystardy jan-jaqty keńeıtip, tereńdetip otyrdyq.
Qazirgi kezeńde Astana men Erevannyń qarym-qatynasy ashyq saıası dıalogpen, saýda-ekonomıkalyq saladaǵy yntymaqtastyqtyń serpindi ósýimen, jan-jaqty damyǵan mádenı-gýmanıtarlyq baılanystarmen sıpattalady.
Bizdiń elderimiz álemdik arenada birlesip jumys isteýdiń oń tájirıbesin jınady. Ár túrli halyqaralyq ınstıtýttarǵa usyný kezinde bizdiń bastamalarymyz ben kandıdatýralarymyzǵa ózara qoldaý kórsetiledi.
Osy múmkindikti paıdalana otyryp, Eýrazııalyq ekonomıkalyq odaqtaǵy armıan tóraǵalyǵyna tabys tileımin.Júıeli negizde parlamentaralyq áriptestik damýda. Úkimetaralyq deńgeıde ózara is-qımyl serpindi júzege asyrylýda.
Sharttyq-quqyqtyq baza birtindep keńeıip keledi. Armenııaǵa aldaǵy saparym barysynda biz birqatar jańa qujattardy qabyldaımyz.
Sońǵy bes jylda ózara saýda 3,5 ese ósti. 2023 jyly taýar aınalymy 23% - ǵa ósti. Árıne, saýda kólemi bizdiń áleýetimizge sáıkes kelmeıdi, biraq buǵan elder arasyndaǵy kúrdeli kólik logıstıkasymen baılanysty obektıvti sebepter bar. Degenmen, eksporttyq-ımporttyq múmkindikter ózara saýdany aıtarlyqtaı keńeıtý úshin taýashalardyń bar ekendigin kórsetedi. Jaqynda Erevanda ótken Qazaqstan men Armenııa kásipkerleriniń qatysýymen ótken Bıznes-forým osyny aıqyn kórsetti.
Munda saýda-ekonomıkalyq yntymaqtastyq jónindegi úkimetaralyq komıssııa - memleketaralyq ózara is-qımyldyń negizgi ınstıtýty. Ol qurylǵannan beri 25 jyl ótti.
Biz baılanystarymyzdy odan ári tereńdetýge jáne keńeıtýge nıettimiz. Osy jyly Armenııanyń Ararat jáne Aragasotn oblystarynda Qazaqstannyń qurmetti konsýldarynyń qosymsha keńselerin ashý týraly sheshim bizdiń nıetimizdi is júzinde rastaý bolyp tabylady.
Astana men Erevan, sondaı-aq basqa da qalalar arasynda baýyrlastyq baılanys ornatý boıynsha qolda bar josparlar da osyǵan yqpal etetinine senimdimin.
Iskerlik yntymaqtastyq pen týrızmdi damytýǵa 2023 jyly "Aqtaý – Erevan – Aqtaý" baǵyty boıynsha tikeleı reısterdiń ashylýy yqpal etedi.
О́nerdi, sportty, týrızmdi, bilim berýdi, densaýlyq saqtaýdy jáne t.b. qamtıtyn mádenı-gýmanıtarlyq sala praktıkalyq mazmunǵa toly.
Jalpy, dostyq, senim men ózara túsinistikke negizdelgen qazaq-armıan qarym-qatynastarynyń deńgeıi eki halyqtyń múddesine saı keledi. Birlesken kúsh-jigermen biz Qazaqstan men Armenııa arasyndaǵy kóp qyrly baılanystardyń barlyq spektrine jańa serpin bere alatynymyzǵa senimdimin», dedi Prezıdent Qasym-Jomart Toqaev.