Senat Tóraǵasy Máýlen Áshimbaev analıtıkterge Big Data-men jumys isteý jáne JI-di qoldaný tásilderin úıretetin semınardyń ashylýyna qatysty. Kýrsqa Senat janyndaǵy Jas sarapshylar klýbynyń músheleri jáne Taldaý mektebiniń osy salada belsendiligimen tanylyp júrgen túlekteri qatysyp jatyr, dep habarlaıdy Egemen.kz joǵarǵy Palatanyń baspasóz qyzmetine silteme jasap.
Máýlen Áshimbaev Sıfrlyq damý, ınnovasııalar jáne aeroǵarysh ónerkásibi mınıstrligimen birlesip Big Data boıynsha semınar ótkizý Senattyń Taldaý mektebi men Jas sarapshylar klýby sheńberindegi jumystardyń laıyqty jalǵasy ekenin atap ótti. Mundaı jobalar jas mamandardyń taldaý daǵdylaryn jetildirýdi, kásibı saraptamalyq qaýymdastyqtardy biriktirýdi jáne sol arqyly Qazaqstandaǵy taldamalyq jumystyń sapasyn arttyrýdy kózdeıdi.
Aıta ketsek, qazirgi ýaqytta Senattyń saraptamalyq alańdaryna qatysýshylar 200 adamnan asady. Olar – túrli salada eńbek etip júrgen jas mamandar.
«Búginde sapaly analıtıka jasaý úshin Big Data qajetti sharttardyń birine aınalyp otyr. Alaıda, sarapshylardyń bári birdeı memlekettik derekkózderdiń naqty múmkindikterin jáne jasandy ıntellekttiń zertteýge tıgizetin úlken yqpalyn bile bermeýi múmkin. Sondaı-aq qazirgi kezde aýqymdy derekter bazasymen tıimdi jumys isteı alatyn mamandardyń da tapshy ekenin kórip otyrmyz. Sondyqtan bizdiń basty mindetimiz – sarapshylarǵa osy derektermen jumys isteýdi úıretý, praktıkalyq sheshimder qabyldaý úshin Big Data-ny qorytýdyń jańa, ınnovasııalyq tásilderin tabý jáne atalǵan múmkindikterdi paıdalanyp, eldiń damýyna arnalǵan zertteýler júrgizý», dedi Máýlen Áshimbaev.
Is-sharada aldaǵy dárister sheńberinde Smart Data Ukimet úlken derekter platformasyn ıgerý boıynsha praktıkým ótkiziletini aıtyldy. Bul júıe 90-nan astam memlekettik organnyń aqparattyq júıelerinen alynǵan derekterdi biriktiredi jáne Ulttyq JI platformasy sanalady.
Semınarǵa Sıfrlyq damý, ınnovasııalar jáne aeroǵarysh ónerkásibi mınıstri Baǵdat Mýsın, jasandy ıntellekt tehnologııalaryn damytý jónindegi sarapshylar jáne memlekettik derekter bazasynyń jumysyn qamtamasyz etetin kompanııalardyń ókilderi qatysty.