Jyl boıy atqarylatyn jumys

Báıdibek aýdanynda «Meniń talym!» atty is-sharada aýyldyq okrýg ákimi apparatynda ju­mys isteıtin kyzmetkerler otbasylarymen birge aýdan or­talyǵyndaǵy T.Rysqulov kóshesiniń boıyna 100 túp sándi tal otyrǵyzdy. Jalpy, óńirde ta­zalyq baǵytynda atqarylar jumystar bo­ıyn­sha ár aptanyń ózindik ataýy men naqty maq­sat­tary bar. Iаǵnı «Taza ólke», «Kıeli meken», «Ja­syl aımaq», «О́negeli urpaq», «Móldir bulaq» apta­lyq­tarynda óńir turǵyndarynyń ekologııalyq mádenıetti qalyptastyrý, qorshaǵan ortany tazartý, kógal­dandyrýǵa qosar úlesi mol bolmaq. Igi iste barlyq aýdan, qala belsendilik tanytyp jatyr.

Mysaly, Kentaý qalasyndaǵy alleıalar abattandyrylyp, oryndyqtar men qoqys jáshikteri tazalanyp, syrlandy. Jaryqshamdar qalpyna keltirildi jáne taldardyń túpteri aǵartyldy. S.Seı­fýllın kóshesine 5 myń dana raýshan gúli otyr­ǵyzyldy. Buǵan qosa kóshe qıylystaryna, alleıalar men saıabaqtarǵa 20 myń dana raýshan gúli jáne 40 myń dana birjyldyq gúlder otyrǵyzylmaq. Abaı dańǵyly boıyndaǵy K.Jumadilov atyndaǵy alleıaǵa shyrsha, qaraǵash kóshetteri otyrǵyzyldy. Oblystyq tabıǵı resýrstar jáne tabıǵat paıdalanýdy retteý basqarmasynyń tarapynan 8 500 túp qaraǵash kóshetteri úlestirilip, «Jasyl aımaq» ýchaskesine otyrǵyzyldy.

Al Arysta jalpy uzyndyǵy 29 shaqyrym bolatyn 4 kanalǵa mehanıkalyq tazalaý jumystary júrgizildi. Saýran aýdanyna qarasty 12 aýyldyq okrýgtiń ishki kósheleriniń boıy men iskerlik aýmaq­tarǵa 25 myń túp qaraǵash pen úıeńki otyrǵyzyldy. So­nymen qatar Shornaq meshitiniń 3,5 gektar aýma­ǵyna 1000 túp jemis aǵashy egildi. Aldaǵy ýaqytta ta­ǵy 26 myń túp aǵash kóshetin otyrǵyzý josparlanyp otyr.

Sozaq aýdany ortalyǵyndaǵy «Abaı» jáne «Táýel­sizdik» saıabaqtaryna 2 myńǵa jýyq kóshet egilse, Sholaqqorǵan – Túrkistan baǵytyndaǵy «Ja­syl beldeý» aýmaǵyna jańadan egilgen tal kóshet­teriniń sany 4 myńǵa jýyqtady. Munda jańadan egilgen tal kóshetterin sharbaqpen qorshaý, tamshylatyp sýarý qondyrǵysyn ornatý is-sharalary júrgizildi. Aýmaǵy 10 shaqyrym bolatyn «Jasyl beldeý» aımaǵynda búginge deıin egilgen kóshetterdiń sany 10 myńnan asty. Ekologııalyq aksııa aıasynda Ordabasy aýdanynda aýqymdy senbilik ótip, jol boıyndaǵy aǵashtar aqtalyp, aryq-atyzdar, aıaqjoldar tazartyldy. Sondaı-aq halyq qalaýlysy Nuzat Ortaı óz esebinen 300 metr tor alyp berip, nátıjesinde turǵyndar asarlatyp kóshet egilgen aýmaqty qorshap aldy. Tólebı aýdanynyń turǵyn­dary da tazalyq is-sharasynda belsendilik tanytty. Tabıǵat janashyrlary 29 600 túp kóshet otyrǵyzdy.

Abattandyrý, kógaldandyrý jáne tazalyq jumystarynyń sapaly júrgizilýi de qatań baqy­laýǵa alynǵan. Oblys ákimi apparatynyń aptalyq májilisinde óńir basshysy Darhan Satybaldy bul baǵyttaǵy jumystardyń áli de óz deńgeıinde júıelenbegenin aıtyp, jaýaptylarǵa tapsyrmalar júktedi.

«Memleket basshysynyń tapsyrmasy aıasynda 2021–2025 jyldar aralyǵynda óńirimizdegi 800-den asa eldi mekendi kógaldandyrý úshin 4 mıllıon­nan asa kóshet otyrǵyzý kózdelgen. Bıyldyń ózinde mıllıon­nan asa kóshet egiledi. Ákimi qandaı bolsa, aýyly sondaı. Birneshe ret bul másele bo­ıynsha tapsyrma berildi. Birneshe aýdan, qalada ǵana sál nátıje, qozǵalys bar. Qalǵandary áli de nemquraıdy. Biz tazalyq pen abattandyrýdy jyl boıy talap ete beremiz. Eger ony oryndaı almaıtyndar bolsa, shara qoldanamyz», dedi D.Satybaldy.

О́ńirde 2024–2026 jyly qalalardy kógaldandyrý jáne abattandyrý jol kartasy bekitilgen. Naýryz aıynan bastap uıymdastyrylǵan senbilik­terde aýdan, qala ákimdikteri tarapynan 201 myńnan asa aǵash kósheti otyrǵyzylyp, 317 030 aǵash ákteldi. Senbilikterde 2 710 tonna qoqys shyǵarylyp, 1 152 kósheniń boıy, 265 shaqyrym aıaqjoldar tazalandy. 275 saıabaq pen gúlbaq, 192 balalar jáne sport alańshasy retke keltirildi. 95 shaqyrym kópir­, ózen, kanal men bulaqtyń arnala­ry tazalandy, 897 kópqabatty turǵyn úı mańynd­aǵy aýmaqtar men aýlalar, jertóleler, kire­be­risteri jınaldy. Eldi mekenderde abattandyrý ny­sandaryn jáne sanıtarııa jaǵdaıyn qalypty deń­geıde ustaý maqsatynda mobıldi toptar qu­rylyp, aralaý kestesi bekitilip, qajetti qural-saı­manmen qamtylǵan.

Sondaı-aq qalalar men eldi mekenderdiń aýmaq­taryn abattandyrý qaǵıdalary men ınfraqurylym nysandaryn buzý, jasyl ekpelerdi joıý jáne búldirýdiń aldyn alý maqsatynda «Ákimshilik quqyq­­buzýshylyq týraly» kodekstiń baptaryna sáıkes sharalar qoldanylǵan. Atap aıtqanda, bıyl oblys aýmaǵynda joǵaryda atalǵan máselelerge baılanys­ty zań buzyp, tazalyqqa, ınfraqurylymǵa nuqsan keltirgen júzdegen turǵynǵa jalpy kólemi 81,1 mln teńge aıyppul salynǵan.

Túrkistan oblysy