Cý basqan aımaqtarǵa jan-jaqty qoldaý kórsetý maqsatynda Túrkistan oblysynda jaýapty basqarmalardyń úılestirýimen, Atyraý oblysyna 160-qa jýyq tehnıka joldandy. Atalǵan tehnıkalar Darbaza, Túrkistan, Mankent, Arys stansalarynda vagon-platformalarǵa tıelip, Atyraý stansasyna «QTJ» UK-nyń belgilengen kestesine sáıkes jetkizildi.
Kásipkerlerden bólek, «Qazatomónerkásip» kompanııasy, «Qazavtojol» mekemesi atynan da aýyr kólikter jiberildi. Arnaıy júk artqysh jáne júk tasymaldaıtyn, jer qazatyn kólikter jáne ózge de tehnıkalar sý shaıǵan aýmaqtardy tazalaýǵa jáne bógetter salýǵa qoldanylmaq.
Sondaı-aq Túrkistan oblysynan sý basqan óńirlerge jalpy 600 tonnaǵa jýyq gýmanıtarlyq kómek jiberilgenin aıta ketelik. Sonymen qatar 150-den asa kásibı qutqarýshy men tótenshe jaǵdaı qyzmetkerleri apat aımaǵynda jumys istep jatyr. Oblys ákimi Darhan Satybaldynyń tapsyrmasymen óńirde gýmanıtarlyq kómekti úılestiretin shtabtar qurylǵan. Sý tasqyny bolǵan ýaqyttan beri óńirden Batys Qazaqstan, Aqtóbe, Atyraý oblystaryna 371 tonna gýmanıtarlyq kómek jóneltilip, eriktiler kómekke bardy. Al jýyrda Túrkistan halqy atynan 9 aýyr júk kóligi men qosymsha kólikterge tıelgen 200 tonnaǵa jýyq kezekti gýmanıtarlyq kómek kerýeni jolǵa shyqty. 50 erikti jas arnaıy avtobýspen jiberildi. Olar sý tasqyny saldaryn joıý, uıymdastyrý jumystaryna atsalysady.
Qazaqstan halqy Assambleıasynyń «Júrekten – júrekke!» aksııasy aıasynda oblystyq ózbek jáne túrik etnomádenı birlestikteri birlese otyryp, 5 júk kóligine tıelgen gýmanıtarlyq kómekti sý basqan aımaqtarǵa jóneltti. Sonymen qatar Saryaǵash, Otyrar, Keles, Saıram, Saýran aýdany men Kentaý qalasy turǵyndary atynan qajetti zattar tıelgen júk kólikteri de jolǵa shyqty. Olarǵa negizinen azyq-túlik, kórpe-tósek, kıim-keshek jáne qurylys materıaldary artylǵan.
Oblys ákiminiń orynbasary Beısenbaı Tájibaev atqarylyp jatqan sharanyń mańyzdylyǵyna toqtalyp, qıyn jaǵdaıda kómek qolyn sozǵan oblys turǵyndaryna, kásipkerlerine, jastarǵa, óńirdegi Assambleıa múshelerine alǵysyn bildirdi.
«Arystaǵy jarylys, Maqtaaral aýdanyndaǵy sý tasqyny kezinde de elimizdiń barlyq oblysy kómek qolyn sozyp, kún-tún demeı gýmanıtarlyq kómek jetkizgeni esimizde. Alǵashqy kúnnen bastap oblysta shtab qurylyp, aýdan, qalalardan júk kerýenderi jiberildi. Mine, endi búgin sol izgi isterdiń jalǵasy retinde oblystyq Qazaqstan halqy Assambleıasy men aýdan, qala turǵyndarynyń atsalysýymen Batys Qazaqstan oblysyna 200 tonnaǵa jýyq gýmanıtarlyq kómek jolǵa shyǵaıyn dep tur», dedi B.Tájibaev.
Aıta keteıik, aýdan, qalalarda jeke azamattar da uıymdasyp, júk kólikterimen kómekterin jiberip jatyr. Sonymen birge «Kúshimiz – birlikte!» qoryna qarjy aýdarylyp jatyr. Mysaly, Saıram aýdany Qarasý aýyldyq okrýgi, Tólebı aýdany Maıbulaq, Jambyl aýyldarynyń turǵyndary Naýryz merekesin atap ótýge jınalǵan qarjyny sý basqan óńirlerge aýdarýdy uıǵardy. Oblys ortalyǵynda ornalasqan «Ekobazarda» óńirlik kásipkerler palatasynyń uıymdastyrýymen gýmanıtarlyq kómek pýnkti jumys istep jatyr.
Túrkistan oblysy