Tasqyn sý saldarynan birqatar óńirdiń mektepteri oqýshylardy qashyqtan oqytýǵa kóshkeni málim. Senator Ǵalıasqar Sarybaev óziniń depýtattyq saýalynda tasqyn sýdan zardap shekken óńir túlekteriniń UBT-ǵa daıyndyq máselesin kóterdi, dep habarlaıdy Egemen.kz Senattyń baspasóz qyzmetine silteme jasap.
Senatordyń aıtýynsha, memlekettik bilim berý granttary boıynsha konkýrsqa qatysýǵa arnalǵan UBT-ǵa daıyndyqty tótenshe jaǵdaı ózgertip jiberdi. Saldarynan oqýshylardyń aldaǵy testige sapaly daıyndalýǵa múmkindigi joq. Balalardy UBT-ǵa daıyndaý salasyndaǵy retteýdi memlekettik organnyń birde-bireýi júzege asyrmaıdy. О́ıtkeni Oqý-aǵartý mınıstrliginde de, Ǵylym jáne joǵary bilim mınıstrliginde de atalǵan mindet kózdelmegen.
«Talapkerler bir mekemege oqýshy emes, ekinshisi úshin áli stýdent emes. Osyǵan baılanysty zardap shekken aımaqtardaǵy oqý bitiretin túlekterdiń taǵdyryna alańdap otyrmyz. Tabıǵı apatqa baılanysty sol balalardyń ulttyq biryńǵaı testileýde tómen nátıje alý qaýpi bar. Sondyqtan olar memlekettik bilim granttaryn ala almaı qalýy múmkin», dedi Ǵalıasqar Sarybaev.
Osyǵan baılanysty depýtat talapkerlerdi daıarlaý máselesin sheshý maqsatynda tıisti shara qoldanýdy surady. Ásirese, túlekterdiń qujattaryn tezirek qalpyna keltirýge járdem kórsetý týraly mınıstrlikterge usynys aıtyldy. Testileýdiń ekinshi sessııasynyń basynda UBT ótkizý pýnktteriniń qyzmetin qalpyna keltirý qajettigi atap ótildi.