Qamysty aýdandyq sotynda qyzmet babyn paıdalanyp, bireýdiń senip tapsyrylǵan múlkin iri mólsherde urlaǵany úshin kináli dep tanylǵan býhgalterge qatysty qylmystyq is qaraldy. Sotta óziniń qyzmet babyn paıdalanǵan býhgalter-kassırdiń kásiporyn kassasynan 8 600 000 teńgeden astam qolma-qol qarajat alǵany anyqtaldy. Ol bul aqshany jeke qajettilikterine jumsaǵan. Býhgalter óz kinásin tolyq moıyndady. Bul týraly oblystyq sottyń baspasóz qyzmeti habarlady, dep jazady Egemen.kz.
Sot jaryssózderinde memlekettik aıyptaýshy sottalýshyny 3 jyl merzimge uıymdarda býhgalterlik esepti oryndaýǵa baılanysty laýazymdardy atqarý quqyǵynan aıyra otyryp, 6 jyl 4 aı merzimge túrmege qamaýdy surady.
Onyń qylmystyq quqyq buzýshylyqtary kýágerlerdiń aıǵaqtarymen, saraptama qorytyndysymen jáne istiń basqa da materıaldarymen rastaldy.
Sot býhgalterdiń qylmystyq jaýaptylyǵyn jáne jazasyn jeńildetetin mán-jaılar retinde shyn júrekten ókinýin jáne kishkentaı balalarynyń bolýyn eskerdi.
Is boıynsha jazany aýyrlatatyn mán-jaılar anyqtalmaǵan.
Nátıjesinde, sot aıyptalýshyǵa qatysty 3 jyl 6 aı merzimge bas bostandyǵyn shekteý túrindegi jazany taǵaıyndady. Sondaı-aq sottalýshy 4 jyl merzimge býhgalterlik esep jáne kassır laýazymdaryn atqarý quqyǵynan aıyryldy.
Zalaldy ishinara óteýdi eskere otyryp, azamattyq talap tolyq kólemde qanaǵattandyryldy.
Úkim zańdy kúshine engen joq.