4 makroóńirde ekonomıka salalary boıynsha, onyń ishinde sý salasynyń bolashaq mamandaryn daıarlaıtyn tirek kolledjder qurylady. 2024-2025 jyldary «Sýmen jabdyqtaý jáne sý burý júıeleriniń tazartý qurylystaryn paıdalaný», «Gıdrotehnıkalyq melıorasııa», «Gıdrotehnıkalyq qurylys» jáne taǵy basqa mamandyqtar boıynsha tehnıkalyq jáne kásiptik bilim berýde memlekettik bilim berý tapsyrysyn ulǵaıtý josparlanyp otyr, dep habarlaıdy Egemen.kz Oqý-aǵartý mınıstrliginiń baspasóz qyzmetine silteme jasap.
«Ońtústik makroóńirdegi tehnıkalyq jáne kásiptik bilim berýdiń bas tirek uıymy retinde Shymkent qalasyndaǵy Manap О́tebaev atyndaǵy jańa tehnologııalar joǵary kolledji tańdaldy. Munda «Sýmen jabdyqtaý jáne sý burý júıeleriniń tazartý qurylystaryn paıdalaný» mamandyǵy boıynsha kadrlar daıarlanady. Stýdentterge óndiristik praktıkadan ótý múmkindigi beriledi, al arnaıy pánder pedagogteri men óndiristik oqytý sheberleri úshin biliktilikti arttyrý kýrstaryn ótkizý josparlanǵan. Sondaı-aq óndiristen mamandar tartýdy josparlap otyrmyz», dedi tehnıkalyq jáne kásiptik bilim departamentiniń dırektory Áset Muhanbetov.
Aıta ketsek, Qazaqstanda bes kolledj sý salasynyń mamandaryn daıarlaıdy. I.Ábdikárimov atyndaǵy Qyzylorda agrarlyq-tehnıkalyq joǵary kolledji, Maqtaaral agrarlyq kolledji, Túlkibas agrobıznes jáne týrızm kolledji, Úshqońyr sý sharýashylyǵy kolledji jáne Manap О́tebaev atyndaǵy jańa tehnologııalar joǵary kolledjinde gıdrogeologııa salasynyń 300-ge jýyq bolashaq mamandary oqıdy jáne olardyń 90%-y memlekettik bilim berý tapsyrysy boıynsha bilim alady.