Sıntetıkalyq esirtki taratýshylar kóbeıgen

Tekserý kezinde kú­dik­ti kelin­shek­tiń qalta­sy­nan, jalǵa alǵan páte­riniń qýys-qýysynan, jatyn ból­mesinen, tipti dárethanasynan túıil­gen sıntetıkalyq esirtkiler tabyl­ǵan. Untaq túrinde qalta­sha­larǵa salynǵan álgi zattar satyp alýshylar úshin arnaýly jerlerge jasyrylatyn «tyǵyndylar».

Tárkilengen esirtkilerdiń jal­py salmaǵy – 227,97 gramm. Bul – «α-PvP» dep atalatyn sın­te­­tı­kalyq esirtki. Esirtki saýdager­leri­niń ózderi ony «tuz» dep ataı­dy. Sonymen birge tabylǵan sarǵysh tústisi «mefedron» dep atalady. Onyń salmaǵy 57,57 gramm bolǵan. Esirtkige qatysty aı­tyl­ǵan­da bular óte úlken kó­lem­ bolyp esepteledi.

Kúdiktiniń úıinen esirtkini qal­ta­shalarǵa salý úshin ólsheıtin arnaýly elektrondy tarazy, túıin­shekteıtin materıaldar da tabyl­dy. «Kúdikti áıeldiń ózi esirt­­kige táýeldi. Ol buryn da esirt­ki saqtaǵany úshin sottalyp, bas erkinen aıyrylǵan. Alaıda túr­­­­me­den shyqqannan beri úsh aı boıy qaıtadan esirtki qoldaný men taratý jolyna túsken. Endi ol Qylmystyq kodekstiń 297-babynyń 3-tarmaǵymen esirt­ki­ni úlken kólemde taratqany úshin keminde 10 jylǵa bas erkinen aıy­ry­lady», deıdi EQKB basshysy, pod­pol­kovnık Rýslan Saparov.

Qaltashalarǵa salynyp, tú­ıin­­­­shek­telgen esirtkini qala­nyń túr­li qýysyna kúdik keltirmeıtin áıel­der men jasóspirim balalar tara­tady. Olar satyp alýshynyń aqsha­syn alǵannan keıin shartty sóz­dermen kelisip, «tyǵyndy» jasy­ry­latyn jerdi telefonmen aıtady.

Petropavl qalasynyń «Ju­mys­shy» kentinde «Toyota RAV4» kó­li­gimen júrip, esirtki salyn­ǵan túıinshekterdi arnaýly jer­lerge jasyryp júrgen 33 jáne 36 jastaǵy eki áıel de ustaldy.

33 jastaǵy áıeldiń kúıeýi mundaı zańsyz, ońaı jolmen aqsha tabatyn «sharýamen» aınalysqany úshin 2022 jyly sottalyp, qazir jazasyn ótep jatyr eken. Áıeli sonyń qylmysyn jalǵastyryp júrgen bolyp shyqty. Kóliktiń ishinde otyrǵan 36 jastaǵy ekinshi áıel de esirtkige táýeldi jandardyń biri eken. Olardyń úılerin tintý barysynda úlken kólemdegi, ıaǵnı 700 grammdaı aq untaq tabyldy. Bul da «tuz» degen ataýmen belgili «α-PvP» sıntetıkalyq esirtkisi. Eki áıeldiń de osyndaı qylmyspen aınalysyp júrgenderine tórt aıdaı bolǵany da anyqtalyp otyr.

17 jasar jasóspirim de esirtki túıinshekterin taratýmen aqsha taýyp júrgen. Ony ustaǵan kezde túıinshekter turatyn úıinen tabylmaı, ájesiniń úıine jasy­ryn­ǵany belgili boldy. Úıinen 10 túıinshekke bólinip, satýǵa daıyn­dalǵan sıntetıkalyq esirtki shyǵa kel­gende qarııa shoshyp, talyp qala jazdaǵan. Ájeniń úıindegi esirt­­k­i­niń jalpy kólemi 191 gramm bolǵan

Jasóspirimniń de taratyp júr­geni – «tuz» dep atalatyn ja­sandy esirtki. Keıingi kezde qala­da sıntetıkalyq esirt­ki­ni tara­tý derekteri kóbeıip ket­keni baıqalady. Ustalǵan kez­de 18 jasqa tolmaǵanymen bul jas­ós­pi­rim de sottalady. «Ustal­ǵanǵa deıin ol qashyqtan esirtki taratýmen aınalysatyn ınter­net-dúkenderdiń birinde 3 aıǵa jýyq jumys istep úlgergen. Táji­rıbe kórsetkendeı, esirtki taratý­shylardyń barlyǵy osynsha mer­zim­ge ǵana saırandaı alady, odan ári báribir qamaýǵa alynyp, sottalady», deıdi Rýslan Saparov.

Byltyr da oblysta esirtki taratqany úshin kámelettik jasqa tolmaǵan 2 jasóspirimge sot úkimi shyqqan bolatyn.

Soltústik Qazaqstan oblysy